Shillong, Risaw 13
U Rangbah Shnong ka Umpling, u Bah SF.Pyngrope u la ïathuh ba ïa ka Bajanai Khyllep la lap ha ka jaka trei jong u wei u khynnah shynrang, kaba don ha shnong Umpling.
U la ïathuh ba u ne u khynnah shynrang uba la ïalam ïa ka Bajanai um dei u trai shnong na Umpling bad u dei uba shu wan bylla.
Haba ïakren bad ki lad pathai khubor u Bah SF.Pyngrope u la ong ba ïa katei ka khynnah kynthei la dep ban leh ïa ka medical check-up, ha Ganesh Das Hospital, Shillong bad kam don kaei-kaei kaba la jia bad kam shym don kino-kino ki dak sniew ïa kamet jong katei ka khynnah bad la aiti noh ïa ka sha ki kmie ki kpa.
“Haduh mynta ka shnong kam pat tip la u ne u khynnah shynrang u dei na kaei ka shnong bad u sah shaei. Bad um don ruh ha ka thup kyrteng jong ki nongshong wai ha Umpling,” la ong u Bah SF.Pyngrope.
Ka jinglap ïa kane ka khynnah ba ka don lang bad u ta u khynnah shynrang kadei ha ka step synnia ha ka por 2 baje duna eiei jong ka 13 tarik u Risaw 2025 katkum ka jingïoh jingtip jong ka shnong, la ong u Bah SF.Pyngrope.
Halor ka jingjia bteng ka jingjah ki heprit, u Bah SF.Pyngrope u la ïathuh ba ka shnong ka la pyrta shnong bad ka la pyrkhing ruh ïa ki khynnah ba leit jingïaseng ‘Bible class’, ba kim dei ban pyllait shuh ïa ki khynnah hynrei ki dei ban leit shaw beit.
Hadien ka jingjah jong kane ka khynnah kynthei, u la ong “Ngin sa pyrta shnong biang ba ki paidbah nongshong shnong kin peitbha ïa la ki khun bad ban husiar”.
Lah ban kdew hangne ba ka Bajanai Khyllep ka la jah na la ïing ha ka 12 tarik u Risaw 2025, ha ka por 6 baje eiei janmiet, katba dang mut leit paiñkhana, hynrei ha ka jingïawad, la lap pat ba katei ka khynnah ka la sah ha ka jaka trei jong u wei u shynrang kaba don ha Umpling.
