Washington, Risaw:
Ka jingkhmih lynti ka nang kiew ha kylleng ka Israel, ka Gaza Strip, bad ka West Bank mynta ka sngi, katba ka Israel bad ka Hamas, ki la sdang ïa ka jingïakylliang ïa ki koidi ha ka jingïateh kular ba la pynïasoh da ka US, ha kaba u President Donald Trump, u la pynbna ba ka thma, ka la kut.
“Ka thma ka la kut, phi sngewthuh ïa kata. Kane kan long ka por kaba kyrpang bha. Baroh ki ïa risa ha kawei ka por. Kata kam pat ju jia mynno mynno ruh. Ka dei ka burom ban don bynta – bad ngin sa ioh ïa ka por kaba phylla,” la ong u Trump, uba leit sha Middle East ban rakhe ïa ka jingsangeh thma bad ka jingïateh kular ban rahbor ïa ki nongshah rahbor.
U la bynrap, “Baroh ki sngewbha, la ka long ki Jiw, ki Muslim, ne ki Arab. Kane ka dei ka sien kaba nyngkong ba ki la iohi ba baroh ki ïatylli. Ngin leit sha Ijipt hadien ka Israel, bad ngin leit ban iakynduh ia baroh ki nongialam jong ki ri kiba khlain bor bad kiba heh bha, bad ki ri kiba riewspah bha, bad kiwei kiwei baroh shapoh kane, bad ki.”
U Trump, u la pynpaw ruh ïa ka jingsngewskhem ba ka jingsangeh thma kan neh, da kaba bynrap ba ka Israel bad ka Hamas ki la thait baroh na ka jingïakhun.
Kane ka jingiateh ban sangeh iasiat ka long hadien ar snem jong ka thma kaba jur bha, kaba la mih hadien ba ka Hamas ka la hiar thma ia ka Israel ha ka 7 u Risaw jong u snem 2023, ha kaba la pyniap ym duna ia ka 1,200 ngut ki briew. Palat 66,000 ngut ki briew ki la iap ha ka thma Gaza – kiba bun na ki ki dei ki riew paidbah. Ka la pynjot ruh ia shibun ki bynta jong ka strip, katba ki jingkhanglad ban ai jingiarap ki la pynmih ia ka jingkyrduh bam ha ki bynta jong ka Gaza.
