Shillong, Risaw 13
U Superintendent of Police ka East Khasi Hills, u Bah Vivek Syiem u la ïathuh ba katkum ka Special Investigation Team (SIT) la lap ba ka jingkhlad i heprit Insa-phira Lyngdoh Mawnai ka dei ba i shah pynïap.
I Insaphira Lyngdoh Mawnai i dei iba dang 4 snem ka rta, ba shong ba sah ha shnong Nongrah Nonglum, iba la jah na la ïing dang step ha ka 14 tarik u Nailur 2025, bad la lap pat ïa ka metïap jong i ha ka step ba bud jong ka 15 tarik u Nailur 2025, na kawei ka ïing briew kaba dang shna thymmai.
U SP u la pyntikna ruh ba dei tang u khynnah ba dang 13 snem ka rta uba la leh ïa kane ka kam ban shim ïa ka jingim jong i heprit Insaphira.
Haba kren sha ki lad pathai khubor ha ka janmiet jong ka 13 tarik u Risaw 2025, u Superin-tendent of Police, Bah Vivek Syiem u la ïathuh ba une u khynnah u la pynïap da kaba pynngam jyllop ha ka jaka ba la lap ïa ka metïap i Insaphira.
U Bah Vivek u la pynpaw ruh ba katkum ka jingkren jong une u khynnah ba dang 13 snem, kam pat da shai bha haduh katta-katta, ba kane ka kam kadei ba ki ïa knieh biskit ba u sa shim ïa ka jingim jong i heprit Insaphira ne ka dei ba u don ka jingthmu ban leh khlem akor.
“Ka kynhun Special Investigation Team (SIT) kan dang tih bniah halor kane ka jingkhlad jong i heprit Insaphira, la kadei ka jingkhlad ba jia ryngkhat ne ïoh lehse ka don kano-kano ka jingpyrshang leh khlem akor,” la ong u Bah Vivek. U la ong ba ka jingtohkit mynta ka dang ïaid haduh khyndai phew sngi bad kin sa buh ka por ban aiti ïa ka ‘chargesheet’ mar shu dep ïa ka jingtohkit.
