Khliehriat, Risaw 13
Ka Jaijai United bad Sakhaiñ Moolimen SC ki la lah ban pynthikna na ka bynta ban jam sha ka final ha ka 2nd Division Football ba pynïaid da ka Saipung Block Sports Association (SBSA) hadien ba ki la khur jingjop ha ka sngi Saitjaiñ.
Ha ka jingïakhun semi final kaba nyngkong kaba la long ha madan Lamyrsiang, ka Jai Jai United ka la pynliem noh ïa ka Mokhain SC da 1-0 kol bad ïa kane la thep da u Anthony Suja ha ka minit 31.
Haba phai sha kawei pat ka jingïakhun, ka Sakhaiñ Moolimen ka la pynliem noh ïa ka Lumtong SC lyngba ka tie-breaker da 4-2 kol hadien ba ki la ïakhaid mar 1-1 kol.
Ka Lumtong ka la pynkhih jar nyngkong lyngba u Nangbun Sutong ha ka minit 9, hynrei ka Sakhaiñ ka la pynphai kylla lyngba u Alnes Lamare (28) na ka bynta ban ïakhaid mar shi kol.
Ha ka jingïalehkai jong ka 1st Division Football Tournament, ka Lumthari SC ka la pynliem noh ïa ka United Biate da 3-0. U Hynruki Suba u la thep ar kol ha ka minit kaba 34 & 41 bad ïa kawei pat la thep da u Damehi Bareh (59).
