Ki surok hi kumba la ju tip naduh ki por mynshwa ki long u thied snam jong ka ïoh ka kot bad ka roi ka par jong kano-kano ka Jylla, ki district ne ki shnong ki thaw bad haba bha ki surok, ki nongleit nongwan ruh ki ju sngewhun ka mynsiem ban leit shano-shano ruh watla ka jaka ba ki thmu ban leit ka jngai ne long pajih.
Kat nang ïaid bad mih uwei u snem na uwei pat, ka jingmih jong ki surok ruh ka la nangbun bad kane ka la pynsuk ïa kiba bun ban leit jingleit ne leit sha ki jaka kiba ki thmu ban leit, naba lada ym lait na kawei ka lad, ki la pyrshang pat na kiwei ki lad bad ïa kane la sakhi ha jan baroh ki jaka na ka jingmih bun ki lad bad ki surok ban pynsuk bad pynkhate ïa ka por bad khamtam ban ïaleh ban pyllait na ka jingdheng kali, lait noh tang ki surok kiba bud sha ki jaka ïew.
Watla ka jingmih jong ki surok la ka long ha ki shnong ki thaw ne ha kino-kino ki bynta ka la nangbun hynrei ka jingbym lah pat ban pynbit pynbiang hadien jong ka jingsniew bad pei thliew, ka wanrah pat ïa ka jingeh kaba khraw ha ka leit ka wan bad khamtam lei ka buh jingma ruh ïa ki nongleit nongwan bad kumjuh ruh ban long kawei na ki daw jong ka jingsniew bad poi karkhana khari-khari jong ki kali ki motor.
Kumba ka long mynta, la sakhi ba ha kiba bun ki bynta jong ki surok ha nongbah Shillong ne wat shabar Shillong ne sha ki thaiñ nongkyndong, ka jingsniew bad jingdon jong ki thliew ki syar hapdeng ki surok ïaid kali ka la long kaba jur bha, kaba la pynthut shi katdei eh ïa ki kali kiba ïaid ba ïeng bad khamtam lei ka jingma ïa ki nongleit nongwan. La ïoh ruh ban sakhi ba ki la don bun ki jingjia jong ka jingur jong ki nongñiah thuk-thuk, namar teng-teng ha ka jingbym poi pyrkhat katba ki dang ïaid ki leit rung ha ki thliew kiba heh ba heh.
La ju sakhi ruh ba ki nongtrei ka tnat PWD ha kiba bun ki khep haba ym pat ïoh ban maramot ïa kine ki surok, ki la shu pyndap tang da ki maw bad khyndew ban ïada na kano-kano ka jingeh jong ka leit ka wan jong ki kali bad don ruh ki shnong kiba mih shakhmat ban shimti ïa kane ka bynta ban pyndap da ka khyndew ha ki jaka ba la thliew shaba palat. Ka jingeh bad jingma hi ba kine ki thliew ki buh ka dei beit ha ka por jong ka jinghap slap, ha kaba ym ithuh shuh ïa ki thliew hynrei la i beit thik kum ki pung dohkha kiba don hapdeng surok.
Ym tang ki surok kiba la rim kiba la sniew bad pei thliew hynrei wat kito ki surok kiba dang dep ban shna tang katto katne bnai ruh ki la sniew bad pei thliew, ïa kaba ym lah ban tip satia na kaei ka daw, hato dei ka jingtrei torti bad ka jingbym leh bha ne dei na kiwei pat ki daw. Wat na ka liang jong ka Sorkar ka la dep ban pyntip ba ka jingsniew bad julor kloi jong ki surok, ka dei namar ka jingjur palat jong ka jinghap slap hynrei haduh katno ka long kaba shisha ym lah ban tip, namar katkum ka jinglap, watla ki surok la dep ban shna kiba biang hynrei la shem pat ba ki nala pyntuid um kim ju biang satia, don ruh ki surok ha kaba ym don ki nala bad kumta haba slap, ka um kam ïoh lynti bad tuid sha surok bad haba don lei ki bynta kiba long them, ka ïoh ban shong bad ym ïoh jaka tuid shuh.
Ka jingkylli kaba mih lyngba ka jingsakhi ïa ka jingsniew jong ka surok ha kiba bun ki bynta khamtam ha nongbah Shillong, ka long ba aiu ka Sorkar ka la leh, namar ym ïohi satia ba kan maramot wat haba ki thliew ki syar ki la don da ki bnai hapdeng ki surok. Hato yn ong ba ka dei ka jingbym shimkhia ki nongmihkhmat ne ka jingleh bym patiaw jong ka Sorkar ne ban shu ai daw ïa u slap, kaba ym lah ban pdiang satia.
Ka por ka la dawa ba ka Sorkar lyngba ka tnat ba dei khmih, ka la dei ban phai khmat noh sha kane ka bynta bad ban sdang noh ka jingmaramot khamtam lei ban ha kito ki bynta kiba bun ki thliew ki syar, na ka bynta ban pynsuk ïa ka leit ka wan, ban weng ïa ki jingma kiba lah ban mih bad kumjuh ruh ban long ka kti jong ka jingïarap ïa ki nongñiah bad ki trai kali, kiba la mad ka jingduhnong na ka jingsniew ba manla ka por jong ki kali.
