SPL 2025: Nangjan ka Shillong Lajong ban rah nam lahduh naba pynliem ïa ka Nongrim Hills

Ka Nongrim Hills ka la ïai sah ha ka kyrdan ba shatrai bad 1 point napdeng ki shiphew tylli ki kynhun.

Shillong, Risaw 13

Ka Shillong Lajong ka dangsah sa tang shisien ïakhun na ka bynta ban rah biang ïa ka nam lahduh ha ka Shillong Premier League, hadien ba ka la lah ban pynliem ïa ka Nongrim Hills da 5-0 kol ha ka lah sngi U Blei ha SSA Stadium kaba ha First Ground, Polo.

U Ricky Kharkongor u la thep ar kol ha ka minit kaba 57 & 68, katba ïa kiwei pat la thep da u Wilbert Marbaniang (7), Deibormame Tongper (45+3), bad u Banlamkupar Rynjah (60). Kane ka long ka jingjop kaba suk eh ïa ka SLFC pyrshah ïa katei ka kynhun kaba don ha ka kyrdan ba shatrai jong kane ka lympung.

Da kane ka jingjop, ka Lajong ka la kamai mynta 18 point na ki phra sien ïakhun, ha kaba ka la tam da 1 point ïa ka Langsning kaba don ha ka kyrdan ba-ar. Ka Nongrim Hills ka la ïai sah ha ka kyrdan ba shatrai bad 1 point napdeng ki shiphew tylli ki kynhun.

Ka jingïalehkai ha ka sngi Ba-ar kan long hapdeng ka Malki pyrshah ïa ka Langsning ha ka por 4:30 nohphai sngi. Kane ka dei ka jingïalehkai kaba khatduh jong ka Langsning ha ka SPL 2025, katba ka Malki ka dangsah sa kawei pat ka jingïakhun.