D H Kharkongor
Mano ban poi pyrkhat ba ka suiñbneng kan long pynban da kumto, kata, myn ha kane ka taïew kaba dang shu dep. Kaba la kumba ka Lyiur kan dang ïaibteng lane kumba ka Lyiur ka dang sahnud ban leit phai noh. Te to ngin kyrmen ba nangne sha khmat ngin sa ïoh ban mad noh ïa ka ‘Synrai’ kaba kumba ka dei ban long.Tangba ngan nym sngewphylla lada kam long kumta.Ngan nym phylla na ka daw jong ka ‘La Nina’. Kumta ngan nym sngewphylla lada ha kane ka Tlang, ka ban sa wan, ka phang Shathie lem bad ka phang Shatei Lammihngi jong ka India ka jong ngi kan mad ïa u slap tlang, uba pateng la pateng. Ynda kumta ka phang kaba Shatei pat de kan mad ïa ka Tlang kaba jlan, kaba lem bad ka ‘cold wave’ lane ka jingkhriat tasam, ka jingrben ka jong u ‘fog’ lane u lyoh khyndew lem ruh bad ka jingrben ka jong u ‘frost’ lane u thah. Kan ktah namar kata tad naduh ïa ka rep ka riang, ka jingkiew jong ka jingdonkam ïa ka bor ding lane ka ‘electricity’ tad haduh ïa ka koit ka khiah.
Ngin ïa poi beit noh ha ka phang, kaba nga kyrmen kan long kum I symbohpyrkhat. Ka jinglah ban pynpoi ïa ka ‘Railway’ tad haduh ha ka thaiñ Mendipathar ka ktik bha ïa ka jingmut jingpyrkhat ka jong nga. Ka pynlong ba ngan angnud ban ioh ban shong ïa kata ka ‘Train’ kaba hapdeng ka Mendipathar Railway Station bad ka Guwahati Railway Station. Ngam shym la ïoh lad ha ka sien kaba nyngkong naba nga shu ioh lad beit thik tang ban sakhi da la ki jong ki khmat ïa ka Mendipathar Railway Station. Ka dei tad haduh ka sien kaba lai (kumba 8 (phra) snem mynshwa) ba nga sa ïoh lad ban shong syndon da kata ka ‘Train’, kata, naduh na Mendipathar Railway Station tad haduh ha Guwahati Railway Station. Kumba phra shiteng mynmied nga iohsngew ïa ka jingsawa jong ka jingwan poi ka ‘Train’ ha Mendipathar Railway Station. Ka ‘Train’ kaba ngan sa shong ynda mynstep. Nga khmih thuh bha tangba nga khlem sakhi ïa ka jingwan poi kyrthep ka jong kita kiba ngi ong ki ‘nongwei shi sngi’ lane ki ‘mynder’. Nga sakhi pynban ïa ki tiar ki tar ne ki mar ki mata, kiba har rukom, kiba ki trai shnong ki wan rah kypang da ka ‘Train’ tad naduh na Guwahati. Ki mar ki mata kiba ki lah ban ioh na ïew Mendipathar-Krishnai lane na ka ïew Dudhoi-Goalpara. Kata kaba nga sakhi ka dei ka daw bah ba balei ba la nang hiar arsut ka die ka thied ha ka ïew Mendipathar-Krishnai, naduh ba ka wan poi ka ‘Train’.
Ha ka step kaba bud, nga poi biang ha Mendipathar Railway Station, kata, kumba hynriew duna arphew minit. Ha shwa ban rung shapoh ka Mendipahar Railway Station, na ka bynta ban thied ‘Ticket’, nga iohi ïa ki traishnong ba ki phriang ïa la ki mar rep. Nga iohi ïa ki nongthied nongpet kiba poi wat naduh na ka thaiñ Resubelpara. Kiba wan kyrpang da ki Auto-rickshaw lem bad kiba wan poi da ki kali lajong. Ka jingïadie ïathied, kaba habar ka Mendipathar Railways Station, kaba thik kum ka ïew rit. Shwa ban mih ka ‘Train’ kita ki juh ki nongrep bad ki nongkhaïi ki lum ki lang wut wut ïa la ki mar ki mata. Ki rah bad ki thep ïa kita baroh hapoh ka ‘Train’. Ka dei tad ynda kumba hynriew shiteng ba ka ‘Train’ ka sa mih suki jai na Mendipathar Railway Station’. Ka ‘Train’ kam khapngiah hynrei ka kylluid. Kham bun napdeng uba kiew pat de ruh u dei hi u traishong, kata, u A’chik lane u Garo bad ruh uba imat kum uba kham duna ka ïoh ka kot lane u paid knup paid trap.
Ka ‘Train’ ka ïaid suki jai tad haduh ha Dudhnai Junction, ha kaba ka hap ban ap ïa la ka jong ka pali ban rung bad bteng ïa ka jingïaid lynti kaba tad shaduh sha Guwahati. Ka ïaid na ka phang kaba shatei jong ka NH 127 (kaba dei ka shibynta jong ka NH 17) tad haduh ha Rampur Flyover, kaba ha khmat jong ka Kukurmara, na kaba ka ïaid pat de sana ka phang kaba Shathie jong ka NH 127 bad ka Dipor Bheltad haduh ha Jalukbarina kaba ka jam biang ïa ka NH 127 na ka bynta ban rung sha Kamakhia Junction kaba ha Maligoan. Na Kamakhia junction ka par biang suki tad haduh ba kan da rung ha Guwahati Railway Station. Ka jingïaid lynti kaba kumba 130 Kms, kaba shipor kumba 4 (saw) kynta tam bad ha ka dor kaba tang 60 (hynriewphew) tyngka. Tang 60 (hynriewphew) tyngka pynban lah ioh ban shong kylluid tad naduh u briew tad haduh ki mar rep ki jong u.
Tad haduh ha Dudhnai Junction ki ïa bun kam ha kaba thew kaba woh bad ha kaba ‘tehkhum’ lane ‘teh song’ ïa la ki jong ki mar rep. Ka dei tad ha Dudhnai Junction ba kiwei kiwei pat ki jaitbynriew ki ïa kiew lang ha ka ‘Train’. Shwa ban jam ïa ka Bamunigoan uba bun u lah dep pynbiang lut nadong shadong, wat naduh kaba bam ïa la ka ‘ja-song’. Naduh Chaygoan lei te u lah shu ïa shongkai biet sadhai ha ryngkat ka khana ka biria. U khie khohreh biang tad haduh shwa ban poi ha Kamakhia Junction, kata, ban lum ban lang ïa la ki mar ki mata khnang ban khamsuk bad kham-kloi ka jingpynhiar pat ïa ki na ka ‘Train’. Te shikhyllipmat na ka ‘Train’ sa ha ki ‘Auto-Pick-up’ kiba la hap lypa kmang ha kito ki ‘gali’ kiba ha syndah ka ‘Railway Line’, kiba ha shwa ban rung hapoh ka Guwahati Railway Station.
Kumta mynstep ki leit ha ryngkat ki mar rep katba mynmied pat ki wan phai ha ryngkat ki mar ki mata, kiba ki ioh ‘bit dor’ na Guwahati. Ka jingleit bad ka jingwanphai kaba shongdor tang 120 tyngka, kata ruh ha ryngkat la ki mar ki mata. Kaei kaei kaba kim ju phohsniew ne kaba ym lah long katba ym pat poi ka ‘Railway’. ïa wad jingtip hi phi katno ka dor ‘shong kali kamai’, shikhlieh briew naduh na Mendipathar tad haduh ha Guwahati. Klet noh shwa ïa ka dor jong ka kit ka bah sa ïa ki mar rep kiba tang kumba 100 kilo ne hangno pat yn kyntiew sa ïa kita ki mar rep kiba kumba 100 kilo. Nga la ioh ban sakhi hi da la ki jong ki khmat ba wat tang ka ‘Mendipathar – Guwahati Passenger Train’ shwa ruh ka lah dei ka jingkyrkhu kaba khraw ïa uba duna ka ioh ka kot. Ka jingmyntoi kaba khraw ïa u paid knup paid trap jong ka thaiñ Mendipathar-Resubelpara. Ka daw bah ba balei ba ki A’chik lane ki Garo kim pyrshah shuh ïa ka ‘Railway’ hynrei ki angnud pynban ba kan rung lem wat sha kiwei kiwei de ki bynta jong ka Ri Lum Garo.
