Nongstoiñ, Risaw 13
Ki nongkhaïi mar rep jong ka thaiñ Ri Mulliang ha ryngkat ka Hynñiewtrep Youth Council (HYC) Ri Mulliang Circle ha ka sngi Nyngkong ki la hiar sha ka ophis jong u Sordar ka Hima Jyrngam Sirdarship ban pynkynmaw ïa ki nongïalam ka Hima ba kin nym ailad ïa ki bar jylla kiba wan ban khaïi bad rung thliew ïing.
U President ka HYC Ri Mulliang Circle u samla Distarborlin Wanniang u la ong ba na ka liang ki nongkhaïi bad ka seng ki la kyrpad na ka hima ba kin pynkynmaw biang ïa ki nongïalam shnong ba kin nym ailad ïa ki bar jylla kiba mlien ban wan khaïi bad rung thliew ïing briew ban wan lum ïa ki mar ki mata ha ki dong ki shnong khlem ki kot ki sla kiba biang kata naduh ki nongkhaïi haduh ki nongbylla.
Shuh shuh u la ong ruh ba na ka liang ki nongkhaïi bad ki nongïalam jong ka seng ha kane ka jingleit ban ïakynduh ïa u Sordar, ki la ïoh ban ïatai ïathir bad ki bor hima ha kaba na ka liang jong ka Hima ka la pdiang ïa ka shithi bad ai ïa ka jingmynjur ban khanglad ïa ki nongkhaïi kiba na bar jylla.
U samla Distarborlin u la ong ruh ba na ka liang ki nongkhaïi bad ka seng ki pynsngew ruh ïa ka jingjur jong ki kam shah tuh shah rong jong ki arshaka, ki tiar ki tar kiba kordor dang ha kine ki sngi khlem da lap dien shuh shano ki rong bad kane ka la nangpyntharai sniew ïa ka seng kum ki kynhun ïoh dei ki bar jylla kiba ju rung ju mih man ka por.
Shuh shuh u la ong ruh ba na ka liang ka seng ka da kyrpad jur ïa ki paidbah ba kin ai ka jingïatreilang khamtam na ki bor shnong ban ïa tehlakam halor kane ka kam khnang ba kan nym buh jingeh ïa ki pateng ban wan.
