Shillong, Risaw 13
Hadien ka jingseisoh ka jingpynlong ïa ki lympung ïalehkai bar ri, ka nongbah Shillong ka la ïoh biang ba kan pynlong sa ka jingïa-lehkai ki kynthei ba la tip kum ka Tri Nation Tour-nament (Senior Women) 2025 mynta u bnai.
Ha kane ka lympung yn wan shim bynta da ka India, Iran bad ka Nepal.
Haba pynpaw ha ki lad pathai khubor ha ka lah sngi U Blei, u Myntri ka tnat ïalehkai ka Sorkar Jylla u Bah Wailadmiki Shylla u la ïathuh ba ka India kan ïakhun pyrshah ïa ka Iran ha ka 21 tarik, kumjuh ka Iran ïa ka Nepal ha ka 24 tarik bad ka India kan ïakhun sa ïa ka Nepal ha ka 27 tarik mynta u bnai. Ïa baroh kine ki jingïalehkai yn pynlong ha Jawaharlal Nehru Stadium, Polo ha ka por 6 baje janmiet.
U la ïathuh ba kitei ki kynhun kin sa wan poi shen ha kane ka nongbah na ka bynta ban pynkhreh ïa kitei ki jingïalehkai. “Ka India kan wan poi ha ka 17 tarik, kumjuh ka Iran ha ka 19 tarik bad ka Nepal ha ka 22 tarik.”
Te kumta na ka liang u Bah Wailad u la kyntu ïa ki paid riew ïeit ïa kane ka jingïalehkai ba kin wan ban sakhi ïa kane ka lympung na ka bynta ban ai mynsiem ïa ki kynhun ba ki kyrshan.
Kum ban shu pynkynmaw dang shen mynta u snem ka Shillong ka la ïoh ban pynlong ïa ki ar tylli ki jingïalehkai bar ri jong ki kynhun ïalehkai ki shynrang nalor ka Durand Cup. Ha ka 19 tarik u Lber ka la pynlong ïa ka jingïalehkai paralok ha kaba ka India ka la jop da 3-0 kol ïa ka Maldives bad ha ka 25 tarik ka India ka la ïakhaid khlem don bathep kol pyrshah ïa ka Bangladesh ha ka Group-C jong ka AFC Asian Cup 2027 Qualifiers.
Kumba ka long mynta ka India ka don ha ka kyrdan ba 63 ha ka FIFA Women’s World Ranking, katba ka Iran ha ka kyrdan ba 70 bad ka Nepal ha ka kyrdan ba 89.
