Shillong, Risaw 14
Ka Nongkseh SC ka la bteng biang ïa ka jingjop ha ka lympung ïalehkai First Division Football League 2025 ba la pynïaid da ka Shillong Sports Association (SSA), hadien ba ka la pynjem khnap ïa ka Nongkrem da shiteng dorjon (6-0 kol) ha ka sngi Ba-ar ha SSA Stadium kaba ha First Ground, Polo.
U Shano Tariang bad u Khrawkupar Jana ki la thep mar ar kol, katba ïa kiwei pat la pynbud da u Chesterpaul Lyngdoh bad u Kitboklang Pale.
Da kane ka jingjop ka Nongkseh ka la ïoh ban lamkhmat ha kane ka lympung watla ka la ïaryngkat mar 9 point ïa ka Meghalaya Police FT, kaba la hiar mynta sha ka kyrdan ba-ar.
Haba phai sha kane ka jingïakhun, baroh ar ki kynhun ki la pyrshah ban ïakhun tyngeh naduh kaba sdang, hynrei kim shym la lah ban thep kol. Hashwa ban kut ka jingïalehkai jong ka kylla step ka Nongkseh ka la ïoh ban pynkhih jar lyngba u Chesterpaul ha ka minit kaba 44 bad ïa kawei pat la thep da u Kitboklang (45+4) na ka bynta ban tam 2-0 kol ha ka kylla step.
Hadien katto katne por ba la bteng ïa ka jingïa-khun jong ka kylla miet, ka Nongkseh ka la thep ïa ka kol kaba lai lyngba u Shano ha ka minit kaba 48. Une u rangïalehkai u la thep biang ïa ka kol kaba ar ka jong u ha ka minit kaba 69.
Watla ka Nongkrem ka la pyrshang ban pynphai, hynrei na kam shym la lah ban pynurlong na ka daw ka jingkhlaiñ bor ki rangïalehkai ka Nongkseh bad ka la shah thep biang sa ar kol hashwa ban wai lyngba u Khrawkupar Jana ha ka minit kaba 85 bad 90+2. Te kumta ka Nongkrem ka la mad ïa ka jingshah rem kaba nyngkong ha kane ka lympung na ki lai sien ïakhun bad kamai 4 point.
Ka jingïalehkai ha ka sngi Balang kan long hapdeng ka Nongthymmai SC pyrshah ïa ka Pohkseh SC ha ka por 1:30 mynsngi.
