Shillong, Risaw 14
Ka Hynñiewtrep Youth’s Council (HYC) Education Cell ha ka 14 tarik u Risaw, 2025, ka la leit ban ïakynduh ïa u Commissioner and Secretary ka tnad ka koit ka khiah ka Sorkar Jylla, u Dr.Joram Beda, ban pan jingshai ha kaba ïadei bad ka jingpynrung kam Medical & Health Officer (M&HO).
Ka seng ka la pan jingshai ha kaba ïadei bad ka rukom bhah namar ba ïa ki Khasi & Jaiñtia ka post ka don tang 4 tylli katba ïa ki Garo ka don haduh 11 tylli.
Haba kren sha ki lad pathai u Bah Roykupar Synrem u la ong ba ki don 21 tylli ki kam ba lait, bad na kine 4 tylli ki post ki dei na ka bynta ki Khasi-Jaiñtia bad 11 tylli na ka bynta ki Garo, 2 tylli na ka bynta ki Unreserved Category bad 4 tylli na ka bynta kiwei pat ki ST/SC.
U la ong ba kane ka bhah kam ïahap bad ka Meghalaya State Reservation Policy jong u snem 1971, kaba la buh ban sam 40% ïa ki Khasi-Jaiñtia, 40% ïa ki Garo bad 20% ïa kiwei pat.
Kumta ka seng ka la dawa na ka Sorkar Jylla ba kan pynsangeh noh shwa ïa kane ka jingpynrung ha ki 21 tylli ki kam Medical & Health Officer (M&HO), da kaba kdew ba kane kam ïahap katkum ka State Reservation Policy.
Nalor kata, u Bah Roykupar u la ong, “Ngi la pan da ka jingkheiñ kaba bniah ïa ka jingbuh kyrpang katkum ka kyrdan ba la pan da ka MMSRB halor ka jingpynrung kam M&HO, ryngkat bad ki kot ki sla kum ki sakhi”.
U Bah Roykupar u ong ba ka HYC ka la pan jingshai ruh ba hato la pyndonkam ne em ïa kino-kino ki kyndon ban rah shakhmat ne ban sahdien ha ka jingpyntreikam ïa ka rukom bhah kam bad ka la dawa ruh ba ka Sorkar ka dei ban pynsangeh shwa ban pynrung kam kat haduh ban da pynbeit.
U la pynshai ruh ba katkum ka Meghalaya State Reservation Policy 1971, na ka bynta kine ki post ki Khasi bad Jaiñtia kim dei ban ïoh tang 4 tylli ki post hynrei kidei ban ïoh 8 tylli ki post.
Shuh-shuh u la pynpaw ïa ka jingsngewkhia ba ka jingbym ïahap ka la wanrah ïa ka jingeh kaba khraw hapdeng ki kyrtong Khasi-Jaiñtia bad u la kyntu ruh ïa ka tnad ka koit ka khiah ban shimkhia ïa ki lad ki lynti ban pynbeit ban pyntikna ïa ka jingbud ryntih ïa ka Reservation Policy bad ka jinglong hok ka rukom thung kam.
“Ngi la kyntu ïa ka Sorkar ba kan wanrah ïa ka rukom treikam kaba pynsuk bad kumjuh ruh ban pynsngewthuh ïa ki briew ha kano-kano ka por ba don ka jingpynrung kam ba katno tylli ki kam, la bhah ïa ki Khasi-Jaiñtia bad Garo. U Joram Beda u la pynshai sha ngi bad pyntikna ruh ïa ngi namar ngi la pyntip ïa u ba ki don ki kyrtong na ka thup Khasi-Jaiñtia kiba long ba kloi ban shakri ha ki jaka pule Sorkar hynrei namar ka Roster, mynta la pyndap tang 4 ngut watla ki don bun na ki, kiba la pyntbit (kumba 100-200 ngut na ki, la ailad tang 4 ngut). Kumta, ngi kwah ba baroh kiba kloi ban shakri ha ki jaka sumar Sorkar kidei ban ïoh lad ban shakri. Bun ki samla ki trei hapoh 3F jong ka Sorkar Jylla bad ki kwah ban shah thungkam pura” la ong u Bah Roykupar Synrem.
“Nalor kata, ngi kyrpad ruh ba ïa ka jingpynrung kam nangne shakhmat dei ban leh kloi katba lah bad u Joram Beda u la pynthikna ïa ngi ba ka jingpynrung kam kan long ha u bnai Nohprah mynta u snem, khnang ba ki kyrtong kiba biang ki dei ban aplai bad yn pynrung ïa ki katkum ka kam ba la mang lane katkum ka Roster ba la pynkhreh da ka tnat,” u la ong.
