Shillong, Risaw 14
Ka tnad Social Welfare ka Sorkar Jylla ka la rakhe ïa ka ‘International Day of the Girl Child’ ban sdang ïa ka jingkylla ha ka imlang ka sahlang ban ai jingkyrshan ïa ki khynnah kynthei da kaba pyrkhat ban sngap ïa ki jingeh ki khynnah kynthei. Ïa kane ka prokram la pynlong ha Lariti International Centre for Performing Arts and Culture halor ka phang “The Girl I Am, The Change I Lead: Girls on the Frontlines of Crisis.”
Ha kane ka sngi u Myntri Rangbah ka Jylla u Conrad K Sangma u la long kum u kongsan ha ka jingdon ryngkat u Bah Paul Lyngdoh, Adviser ka tnad Social Welfare bad ka Dr. Mazel Ampareen ki heh ophisar Sorkar, ki nonghikai skul, ki khynnah skul na ki 50 tylli ki skul.
Haba ai jingkren ha kane ka sngi u Myntri Rangbah u la ong ba ka long kaba kongsan ban rakhe ïa kane ka sngi bad khot lang ïa baroh ban ïatreilang kum ka kynhun ha ka ban roi ha ka jingtip, bad ki jingmut jingpyrkhat bad kyntu ïa ki khynnah ba kin long kiba husiar ïalade bad ban ym ngop ha ki jingshah pynshoi ban leh ki kam bym dei ne ki kam ba sniew.
U la kyntu ïa ki khynnah kynthei ban long kiba skhem jingmut ban sngewthuh ïa kaba dei bad kaba bakla bad ba kin long skhem jingmut ha ka lynti kaba beit.
U Conrad u la ong ba ka jingrakhe ka Sorkar ïa kane ka sngi ka dei ban sdang ïa ka jingkylla ha ka imlang ka sahlang ban ai jingkyrshan ïa ki kynthei. U la kdew ïa ki sienjam ba ka Sorkar ka la leh kum ka jingpynkha ïa ka Reuseable Sanitary Pads Unit ba la bei tyngka da ka Chief Minister’s Special Development Fund bad ba la pynmih da ki Self-Help Group.
U la kren ruh halor ka ka sienjam ba thymmai kaba dei hapoh ka ‘Safe Mother Programme’ kaba kynthup ïa ka song jingïarap ban sumar ïa ki longkmie na ki thaiñ nongkyndong da kaba ai ïa ki tiar na ka bynta ki khyllung ba dang kha ba la pynmih da ki Self-Help Group.
U Conrad u la ailad ruh ïa ki khynnah ban pynsngew ïa ka jingeh jong ki kum ki khynnah ha kaba ki khynnah skul ki la pynpaw ïa ki mat, ban ai jingïarap jingbam skul, ban ai ka jingshngaiñ ïa ki kynthei, ka jinghikai ban ïada ïalade, ki jingïalehkai, bad ban pyllait na ka jingbankhia ha ka jingpule. U Myntri Rangbah da ka jingsbun u la kular man kawei pa kawei ka jingeh jong ki bad pynthikna ba ka Sorkar kan shim ban pyrkhat bniah ïa ki.
Ha kane ka sngi la pynkup burom ruh ïa ki nongjop ha ki bynta bapher-bapher bad ai jingithuh kyrpang ïa ki khynnah kynthei kiba pass bha shakhmat ha ki jingpule, kam ïalehkai, ka jingshakri ha ka imlang sahlang, ka sengkam sengjam, ka jingshlur bad ka jinglong nongïalam ha shnong ha thaw.
