Shillong, Risaw 14
Ki pulit ka thanad Mawryngkneng ha ka miet sngi Nyngkong, ki la ïoh kem noh ïa ki 4 ngut ki nongtuh arshaka ba kynthup ïa arngut ki khynnah bad ïoh kurup ïa kawei ka bike Royal Enfield lem bad ka Maruti Alto ba ki pyndonkam ha kane ka kam bymman.
Kine ki 4 ngut ki kyrteng u Kleston Gympad ba 32 snem bad u Behelden Khyriem ba 20 snem lem bad arngut ki khynnah kiba dei na ka shnong Amlari Model, West Jaiñtia Hills.
Ïa kine ki suba nongtuh la ïoh bat hadien ka jingphet krad na ka jingtalasi kali arshaka jong ki Pulit ka Mawryngkneng ha ka jaka ba la tip kum ka Mawryngkneng-Kynroh Maram. Kane ka la jia ha ka por 10:30 baje mynmiet.
Ha ka kyrwoh khubor ba la pyllait da u Superintendent of Police ka East Khasi Hills, Bah Vivek Syiem, u la ong ba ha kane ka jingtalasi arshaka, kawei ka arshaka kam shym la sangeh bad ka la pynher sted pynban, kaba la pynlong ïa ki pulit ban beh kthong, hynrei hadien katto katne por la lap noh ïa ka bike Royal Enfield (AS01-FY-0871) ba la shu ieh ha ka shnong Mookyndur, West Jaiñtia Hills.
Halor ka jinglap ïa kane ka arshaka, ki pulit kila pynlong ïa ka jingkhynra ha ka thaiñ bad kila ïoh kem ïa kitei ki 4 ngut. La ïathuh ba kine ki 4 ngut ki dei ki briew kiba thmu ban pdiang ïa kane ka arshaka kaba shu tuh.
Ki Pulit ka Mawryngkneng kila kurup noh ïa kane ka arshaka bad kumjuh ruh ïa ka Maruti Alto kaba don ïa u registration number ML04-D-4797 kaba la pyndonkam da kine ki 4 ngut ha kane ka kam bymman.
U Bah Vivek u ïathuh ba ïa kane ka Royal Enfield la tuh na Guwahati Pan Bazaar bad yn sa aiti noh sha ki Pulit ka Guwahati. Ki pulit kila register case halor kane ka jingjia bad ka jingtohkit mynta kala ïaid shakhmat.
