Ki Khasi – Jaiñtia jong ngi kim don ka jingïatylli ha kiba bun ki liang. Ka jingmih bun eh ki seng saiñ pyrthei, ki sengbhalang bad wat ki kynhun balang ruh ka pynpaw ba ngim don ka jingshañiah para Khasi – U Khynriam, u Pnar, u Bhoi, u War u dei u paid Khasi baiar. Kine ki kyntien kiba shongkhia kaba tehsong bad kaba wanrah ïa ka jingïatylli hapdeng u paid ka Bri u Hynñiewtrep.
Ngi ju khot kum ki rit paid pynban ngi duna ka jing-long ïatylli kum ka jaitbynriew. Ka long kaba sngewkhia ban iohi ba ki riew rangbah ki ïa dawa ïa kata ka Khasi Jaiñtia state.
Ngi dei ban ioh ïa ka jong ka Jylla na ki Jaitbynriew Garo. Ban ai nam pat Khasi Jaiñtia state ka paw sha ka pyrthei ba don ar jait ki jaitbynriew, kiba ïapher ka rukom im, ka rukom riam, bad ka ktien ka thylliej. Hato kane ka kyntien Khasi – Jaiñtia kam dei mo ba ngi shu ïa bud tynneng ïa ka buitpoh u nongwei mynshuwa uba synshar donbor ïa ngi kumba ula phiah ruh ïa ka India sha ki ar bynta ba un pyntlot bor ïa ka jingïatylli ka jaitbynriew. Baroh, u Khynriam, u Bhoi, u War, u Pnar, ngi dei kita ki Sub Tribes kiba kyllum lang la khot Khasi tribe. Kane ka long tang ka jingpyni kum u riew paidbah ba sngewkhia ba kan don beit ka jingïatylli lang ha ka pyrkhat ka pyrdain u paid Khasi Khara.
C. B. Iawphniaw
