Shillong, Risaw 14
U Bah Moskalender Marngar, President ka Meghalaya Commercial Truck Owner and Driver Association (MCTODA), u la pynpaw ïa ka jingsngewkhia halor ka jingbun ki kynhun ba pyndik bad dawa pisa na ki nongñiah trok ha ki surok, ba kynthup ruh ki briew kiba kam ba ki dei ki nongïalam sengbhalang bad ki dawa pisa tang na ki trok ba ñiah ki para Khasi.
Haba kren sha ki nongthoh khubor u Bah Moskalender Marngar u la ong, “Ka long kaba sngewlyngngoh ban tip, haba ïoh bylla ki para Khasi ki don pat kiba pynthud hapdeng surok ban dawa pisa, katba ïa ki trok ba nabar ym don ba pynthud, ki ioh ïaid laitluid bad haba pyrshang ban wad jingtip ban ïakren, ha kano ka nongrim ba ki dawa pisa na ki nongñiah trok Khasi, ki aidaw laiphew jait.”
U Bah Moskalender u la ong ba ka long kaba sngewsih ba u para Khasi u khniot ïa u nongñiah trok Khasi, kiba kum kine ki jingjia ïa ki nongñiah trok ka Association kam ïaishah shuh ba kin ïoh shim kabu ïa ki.
U la ong ba myn ha ka miet 13 tarik Risaw 2025 ka la don ka jingjia ba kum ki trai bad ki nongñiah trok kim lah shuh ban shah namar ka la don ka jingban beiñ ïa ki nongñiah trok ha kaba uwei u briew ba la tip kum u Bah Lightstar Marweiñ u ba kam ïalade ba u dei u General Secretary ka Hynñiewtrep Integrated Territorial Organization (HITO) jong ka thaiñ Ranikor, u la pynïeng jubor ïa ki trok hapdeng surok.
U Bah Moskalender u la ong, kaba kham sngewsih eh ka long ba utei u briew u la ujor FIR ïa kawei ka kali tang namar ba katei ka kali kam ai ka jingïatreilang ïa ka jingkwah jong u.
U la kyntu ïa kito ki briew kiba don ka mynsiem ban khñiot ïa ki para Khasi bad ailad pat ïa u bar Jylla ba kin sangeh noh ïa kane ka jingleh jong ki bad kyrpad ba kin kyntiew shuwa para Khasi bad bynrap ba lada kine ki briew ki donkam jingïarap ha kino-kino ki bynta ba kin leit ïakren ïa ki trai kali bad ban nym lehraiñ namar ki trai nongñiah kali ki long kiba kloi ban ïarap.
