Shillong, Risaw 14
Ka kam bylla 100 sngi lyngba ka skhim Mahatma Gandhi National Rural Employment Guarantee Act (MGNREGA) hapoh ka shnong Phurmyrdong B ka la kulmar halor ka jingkynnoh ba leh donbor u Chairman ka VEC.
Ka Secretary jong ka Village Employment Council (VEC) Phudmyrdong B, ka Kong Narisha Khongsit, ki dkhot kumjuh ki nongshong shnong kiba dei ki nongbat Job Card ha kane ka VEC, kaba pyntyllun ïa ki skhim kiba dei lyngba ka Mahatma Gandhi National Rural Employment Guarantee Act (MGNREGA) lane ka jingbylla 100 sngi, ki la mih sha khmat ban kynnoh ba ka don ka jingleh donbor marwei ban pyntyllun ïa ki kam ki jam ka VEC da u Chairman, u Bah Laibodsing Kharphuli uba dei ruh u Rangbah Shnong.
Ka Secretary ka la kdew ba la lai snem ka la bat ïa kam Secretary hynrei kam ju ïoh ban soi ïa ki kot ki sla katkum ki kam ba la bynshet ha ka bad phewse ka lap ba la don ba pynsoi tuh ïa ki kot ki sla ba ka dei ban soi.
Na ka liang ki ki dkhot VEC bad nongshong shnong ki la kynnoh ba u Chairman bad kum u Rangbah Shnong u la pyndonkam bakla ïa ka bor ha kiba bun ki bynta kiba ktah ïa ki paidbah.
Ki ïathuh ruh ba ki jingtrei kiba wan hapoh shnong kim don jingtip ha kaba ïadei bad ka jinglut jingsep bad ki la ong ruh ba nalor kata une u Chairman u pyrshang ruh ban phah pynphai ïa ki pisa kiba ïoh lyngba ka jingtrei kiba la rung ha ki account jong ki paidbah.
Ki la ong ba wat ïa ka skul kaba don ha katei ka shnong u la pynkylla sha ka Training Hall bad buh jingkylli ba balei u hap ban pynpra ïa ka skul bad ki la ong ba ka jingpynpra ïa ka skul ka la wanrah shibun ka jingeh ïa ki khynnah namar ha kawei ka kamra ki hap ban shong lang ar lane lai tylli ki klas.
