Shillong, Risaw 14
Uwei u rangbah ba don jingduna ha ka bor pyrkhat pyrdaiñ, u la shu lait da ka said na ka jingshah bom shnong ha ki paidbhur, halor ka jingsuba ba u dei u “menshohnoh”.
Une u rangbah u dei uba la tip kyrteng kum u Bah Arnikstar Ryntathiang (35 snem), uba dei na ka shnong Umthlong ha Eastern West Khasi Hills District.
Ha ka kyrwoh khubor ba la pyllait da u Superintendent of Police ka East Khasi Hills, Bah Vivek Syiem la ong ba une u rangbah u la shah bat noh ha ka por kumba 9 baje eiei mynmiet jong ka 13 tarik mynta u bnai ha ka shnong Kynroh Nongbri namar ka jingpoi ïaid wir jong u sha katei ka shnong.
U SP u la ong ba ha kane hi ka miet mar ïa ïoh pdiang ka jingpyntip na u Sordar jong ka Krang Nongrum halor ka jingwan poi ïaid wir jong utei u briew bad ïa uba ki la pynshong ïa u hapoh ka ïing shnong jong ka Kynroh Nongbri ban ïada na u paidbhur uba la ïalum paidbah, ki pulit na Sohïong ki la hiar mar-mar sha katei ka jaka bad lap ba ïa une u briew la pahara jur da ki nongïalam shnong bad u Sordar ka Umthlong.
U la ïathuh ba ki paidbhur kila ïalum paidbah shabar ka ïing shnong bad ha ryngkat ka jinghylla, ki la sdang ruh ban ïa kawang da ki maw haba dawa ban aiti ïa une u rangbah sha ki.
Namar ka jingbym lah ban tehlakam tang da ki pulit ka Sohiong, mar-mar ki pulit SOT ha ryngkat u DSP bad ki pulit na Mawngap ki la hiar sha katei ka jaka bad dei tad ynda ki la poi ba la lah ban pyllait noh ïa une u rangbah bad ba la shimti noh da ki pulit.
Hadien ka jingpyllait ïa une u rangbah, ki pulit kila ïalam noh ïa u sha Sohiong Civil Hospital ban phah khmih ha ki doktor ha kaba ki doktor kila pyntip ba u la mynsaw malu mala bad ïathuh ruh ba une u rangbah u dei uba don ka jingduna ha ka bor pyrkhat pyrdaiñ bad ba u dang don hapdeng ka jingsumar ha MIMHANS, Shillong.
Halor kane ka jingjia, ki pulit kila register ïa ka case ha thanad Mawngap ban nang tohkit shuh-shuh bad ban shim kam katkum ka lynti jong ka aiñ.
