Shillong, Risaw 14
Uwei u samla uba dang 19 snem ka rta u la lait da ka said na kti jong ki nongrahbor, kiba la ïoh ban rong noh tang ïa ka pla kot kaba u rah.
Katkum ka khubor kaba la ïoh lum la ong ba ha ka miet 13 tarik mynta u bnai, utei u samla uba dei na Umsning, Ri Bhoi District, u la lait da ka said na ka kti ki runar, kiba ym lah ban ithuh satia, kiba la thmu ban patan ïa u shapoh ka kali jong ki da ka jingthmu ban rahbor ïa u.
La ïathuh ba katei ka jingjia ka dei kaba la jia ha ka por kumba 9 tam eiei katba utei u samla u dang wan na ka jaka shah hikai kot (tuition) na Umsaitsning katba u dang thmu ban leit phai sha la ïing.
Shuh shuh la ong ba mar ïa poi ha ki bynta ka surok PMGSY marjan ban poi ka ophis PHE Umsning Division, kaba dei ruh ka jaka kaba long dum, kawei ka kali Alto kaba ym lah ban ithuh ïa u registration number ne ka rong kali kaba la shu antad ba ka lah ban dei kaba dum rong, uwei na ki ba shong ha katei ka kali u la kylli ïa utei u samla ba un leit shaei.
Ha kane ka por, la ong ba une u samla u la jubab ba un leit sha ïing bad u la ïaid beit khlem da phai dien sha katei kali bad mar kumta hi ki la mih ki briew napoh kali ban patan ïa u. Ha katei ka jingpatan ki la ïoh ban bat na ka plakot ka jong u mar kumta hi utei u samla ruh u la pyllait ïa ka plakot bad her sted ïa lade sha la ïing bad mar kumta hi kitei ki briew ruh ki la phet bak noh na katei ka jaka bad ki la ïoh ban rong lang ïa ka plakot ka jong u.
Halor kane ka jingjia, ha ka 14 tarik u Risaw, 2025, la ïoh jingtip ba ki bahaïing une u samla ki la buh da ka jingmudui ha thanad Umsning ïa kaba ki pulit ki la rejistar mukotduma bad pynlong ka jingtohkit.
Ka kmie jong une u samla ka la ïathuh ba u khun jong ka, mar synpoi ha ïing u la ïam bad kyiuh da ka jingtieng bad u la ïathuh ha ka ïa kaei kaba la jia bad mar-mar la pyntip sha ki nongïalam shnong kiba la leit hiar sha katei ka jaka ba la jia katei ka jingjia hynrei khlem lap dien satia ïa kita ki briew.
U Rangbah Shnong ka Nongthymmai Umsning u Bah Marshal Nongshli, u la ïathuh ba kam pat ju jia mynno-mynno ruh kum kane ka jingjia bad bynrap ba ka shnong ka ju pynlong ïa ka jingpeit pyrman hapoh ka shnong ka thaw da kaba ap miet bad kan dang pynkhlaiñ shuh-shuh ïa kane.
U la kyntu ruh ïa ka Sorkar ba kan pynkhlaiñ ïa ki bor pulit ha Umsning namar kumba ka long hi ki bor pulit hapoh thanad Umsning ki dang duna shaba palat bad ka long kaba eh ban ai ka jingshakri, ka jingïada ïa ki paidbah khamtam ha kum kine ki por ba jur kine ki jingjia kiba sniew.
