Khliehriat, Risaw 14
Ka Narpuh SSC ka la long ka lahduh ha ka lympung ïalehkai First Division 2025 ba la pyniaid da ka East Jaiñtia Hills District Football Association (EJHDFA), hadien ba ka la pynliem noh ïa ka Byndihati CSC lyngba ka tie-breaker da 7-6 kol ha ka sngi Ba-ar.
Kine ki kynhun ki la kiew kyrdan sha ka Super Division ha kaba kin ïoh ban shim bynta naduh u snem ban wan.
Ha kane ka jingïalehkai final kaba la long ha madan Diengshynrum baroh ar ki kynhun ki la pyrshang ban ïakhun tyngeh naduh kaba sdang bad ha kaba kut ki la ïakhaid mar 1-1 kol.
Ban rai ïa ka nam jop, na ka liang ki bor pynïaid ki la pynïashut da ka tie-breaker ha kaba ka Narpuh SSC ka la tam da 7-6 kol ïa ka Byndihati.
Lyngba kane ka nam jop ka Narpuh ka la ïohpdiang ïa ka song pisa kaba T.60 hajar, katba ka Byndihati ka la ïoh T.40 hajar lem bad ki khusnam shimet.
Ïa ki khusnam la sam da ka MLA ka Sutnga Saipung ka Kong Santa Mary Shylla ha ka jingïadonlang u MDC barim ka Musniang Rangad u Bah Phasmon Dkhar kum u symbud kongsan bad kiwei.
