Shillong, Risaw 14
Ka Pay For Right Football Academy bad ka Mawlum Tyrsad SC ki la khur jingjop ha ka lympung ïalehkai Meghalaya State Women’s League 2025 na ka bynta ban bteng ban bat kum ki kynhun kiba khlem pat shah rem.
Ha kane ka jingïakhun jong ka Group-A kaba la long ha ka lah sngi U Blei ha Shillong, ka PFR ka la pynliem noh ïa ka Attacker’s YC da 1-0 kol, katba ka Mawlum Tyrsad ka la jop da 2-0 kol ïa ka Young SSCC ha ka Group-B ha ka sngi Ba-ar.
Kumjuh ha kane ka jingïakhun jong ka Group-B, ka Jakrem SC ka la pynliem noh ïa ka Bright Future SSCC da 3-0 kol. Ïa kine ki jingïalehkai jong ka Group-B la pynlong ha Mawlum Tyrsad.
Ha katei ka jingïalehkai kaba la long ha kane ka nongbah, ka la long kaba itynnad bad kaba ïakhaid, hynrei ka Nisilia Majaw (87) ka la ïoh ban thep shi kol na ka bynta ban pynlong ïa ka PFR ban khur ïa ki lai point. Te kumta ka PFR ka la ïoh ban bat ïa ka kyrdan ba hakhlieh ha ka Group-A ha kaba ka la kamai 9 point.
Haba phai sha ki jingïalehkai hynne ka sngi, ka Jakrem (Mawkyrwat DSA) ka la pynliem noh ïa ka Bright Future (Pyndengumïong DSA) da 3-0 kol. Ka Sunalinda Ïawren ka la thep ar kol ha ka minit kaba 12 & 56 bad ïa kawei pat la thep da ka Ïaphisha Marbaniang (75). Kane ka long ka sien kaba nyngkong eh ïa ka Bright Future ba kan mad ïa ka jingshah rem bad ban shah thep kol.
Ha kawei pat ka jingïalehkai, ka Mawlum Tyrsad (Tyrsad Area SA) ka la pynliem noh ïa ka Young SSCC (Pyndengumïong DSA) lyngba ki ar kol ba la thep da ka H Myrthong (38) bad ka B Khongsit (90+4) na ka bynta ban khur ïa ka jingjop kaba lai. Te kumta ka Mawlum Tyrsad ka la kamai 10 point na ka bynta ban bat ïa ka kyrdan ba hakhlieh ha ka Group-B.
