Shillong, Risaw 14
Ka lympung ïalehkai Ranji Trophy ka wan ïuh kjat biang hangne hapoh ka nongbah, hadien ba ka kynhun ïalehkai ka Jylla Meghalaya kin aireng pyrshah ïa ka Mizoram, ka ban sdang naduh ka sngi Balang ha madan ïalehkai kriket jong ka MCA ha Polo naduh ka por 8:30 mynstep.
Ha kane ka kynti, u Kishan Lyngdoh u la dep ban shah jied ban long kum u nongïalam ïa ka kynhun, bad u vice-captain ka kynhun un dei u Akash Kumar Chaudhary bad ïa kane ka kynhun yn shimti da u Moisten Ch Marak kum u coach.
Katba u Ajay Duhan, sa shisien la jied biang ïa u ban don bynta bad ka kynhun kum uwei na ki ‘guest professional player’ ryngkat bad u Rahul Dalal ba la pdiang bad mynjur da ka BCCI, uba dei u nongtied na Haryana, uba la don bynta lang bad ki kynhun ïalehkai ki jylla jong ka thaiñ shatei lammihngi hadien ba u la mihkhmat teng ïa ka Arunachal Pradesh ha ka samoi ïalehkai 2023-24.
Ha kane ka kynti, ïa ka Meghalaya la pynïakap bad kiwei pat ki jylla ba kynthup ïa ka Bihar, Arunachal Predesh, Sikkim, Manipur bad Mizoram, ha kaba artylli ki kynhun kiba ïoh ban khur bun point na ka ’round robin’ kin khreh ban jam sha ka phainal ka plate group.
Ki kyrteng ki rangïalehkai ka Meghalaya ki kynthup ïa u Aaron AR Nongrum, Akash Chaudhary (VC), Arien B Sangma (WK), Arpit Bhatewara (WK), Aryan Borah, Bamanbha Shangpliang, Bijon Dey, Chengkam Sangma, Dippu Sangma, Jaskirat Singh Sachdeva, Kishan Lyngdoh (C), Kush Agarwal, Swastic Chettri, Ajay Duhan (BCCI-approved guest player), Rahul Dalal (BCCI-approved guest player). Kaba ki nongïarap jong ka kynhun ki long u Moisten Ch Marak (Head Coach), Pyntngen Mark A Swer (Assistant Coach), Surojit Biswas (Physio), Vikash Singh Chauhan (Trainer) & Banteibor Lyngdoh (Manager).
