Shillong, Risaw 14
Ka Federation of Khasi Jaiñtia and Garo People (FKJGP), South West Khasi Hills District, ha ka 14 tarik u Risaw 2025, ka la leit ban ïakynduh ïa u Myntri ba khmih ïa ka tnad pule puthi ka Sorkar Jylla, u Bah Lahkmen Rymbui ban dawa pyndep noh ïa ka jingtei ïa ka Block Institute of Education and Training (BIET) kaba don ha ka shnong Sakwang, South West Khasi Hills.
Haba kren sha ki lad pathai khubor u Bah Ken Nonglait, President u la ïathuh ba kane ka jingtei ka la ïaid da ki phew snem mynta, hynrei ym pat lah ban pyndep.
U la pynkynmaw ruh ba ka South West Khasi Hills District, ka la ïoh ïa ka district ba pura ha ka 03 Nailar (August) 2012 bad ka la long ka district kaba la slem ha ka rta, hynrei ha ki kam pynroi ka dang long kaba dang lung bha khamtam eh ka jingbym don ki jaka pule ne ki Institution kiba biang.
“Kane ka wanrah jingeh shibun eh ïa ki samla pule kiba wan na ki longïing kiba duna ha ka ïoh ka kot, ban pule bad pyntbit ha ki kyrdan kiba kham hajrong,” la ong u Bah Ken.
U la ong ruh ba ka jingbym lah ban pyndep ïa katei ka jingtei ka wanrah ïa ka jingduh jingmyntoi ïa kiba bun ki samla pule jong ka dong ka thaiñ bad ka district kiba kwah ban pule pyntbit ha ka kam hikai. “Namar kumba long mynta ki samla pule ne ki nonghikai na ka district jong ngi kiba don jingthmu ban pyntbit ha ka kam hikai ki hap ban leit pule ha ka DIET Nongstoiñ, West Khasi Hills bad ha kane ka ‘Institution’ ki bhah ïa ka district jong ngi tang 8 seat ha kawei ka batch,” u la ong.
Kumta u la kyrpad na u Myntri ban ïarap bad ban tuklar lem ïa kane ka kam, khnang ba yn lah ban pyndep noh kham kloi ïa katei ka jingtei.
“Ngi kyrmen ba u Myntri un sa shimkhia halor kane na ka bynta ka jingmyntoi ki samla pule ha ka district,” u la bynrap.
