Shillong, Risaw 14
Ka kynhun jong ka Joint Action Committee (JAC) ka la kyrpad ïa ka jingtuklar jong u Myntri Rangbah ka Jylla, u Conrad K. Sangma ban pynkhlaiñ ïa ki bor pahara bad ka jingdon ki pulit ha ka shnong Lapangap, West Jaiñtia Hills ban pyntikna ïa ka jingshngaiñ jong ki nongshong shnong ha ka por ot kba.
Ha ka shithi ba la aiti sha u Conrad ha ka jingïalang kaba la long ha ka Sngi Ba-ar, ka JAC ka la pynpaw ïa ka jingsngewkhia halor ka jingïakynad kaba nang jur bad ki jingjia ba dang shen ha katei ka thaiñ, da kaba kdew ïa ka jingdonkam ban don shuh ki lad jingïada kiba biang khnang ban khanglad ïa ka jingwan rung tuh bad ki kam be-aiñ na shiliang khappud.
Ka komiti ka la kyntu ïa ka Sorkar ban buh shuh ïa ki bor pahara kiba biang, ban pyntikna ïa ka jingïaid pahara kaba ïai bteng, bad ban pynbiang ïa ka jingïada kaba donkam sha ki nongshong shnong.
Ka JAC ka la pan jingshai ruh halor ka jingpyntreikam ïa ka Section 163 jong ka Bharatiya Nagarik Suraksha Sanhita (BNSS) ha ka thaiñ khappud bad ban jur ba kino-kino ki lad jingïada kim dei ban khanglad ïa ka leit ka wan jong ki nongshong shnong lane ïa ki lad kamai jakpoh jong ki.
Shuh shuh, ka komiti ka la maham ba ka Sorkar kan hap shim ka jingkitkhlieh lada don kano-kano ka jingduhnong ïa ki jingthung jingtep ne ki lad kamai namar ka jingbym biang ki lad jingïada bad ka la dawa ruh ïa ka bai lutksan, ki lad jingïarap, bad ka jingkyrshan ban pynbha ïa ka rep ka riang na ka bynta ki longïing kiba shah ktah.
Ïa kane ka shithi la soi da ki sengbhalang bapher-bapher, kynthup ïa ka Synjuk Waheh Chnong Ri Jaiñtia, Rangbah Shnong Lapangap, Jaiñtia Students Union (JSU), Jaiñtia National Council (JNC), Khasi Students Union (KSU), Federation of Khasi-Jaiñtia bad Garo People (FKJGP), bad ka Jaiñtia Students Movement (JSM).
Haba kren sha ki lad pathai khubor hadien ka jingïalang, u Rangbah Shnong ka Lapangap u la ong, “Ngi la kyntu ïa ka Sorkar ban pynbiang ïa ki bor pahara sha ki nongshong shnong khnang ba kin lah ban ot ïa ki jingthung jong ki khlem ka jingsheptieng. U kba u la man bha, bad ki nongshong shnong ki mad ïa ka jingduhnong kaba khraw namar ka jingbym lah ban sumar ïa ki jingthung jong ki naduh u bnai Jylliew. Lada ym ot ïa ki jingthung, ki nongshong shnong ki lah ban mad ïa ka jingkyrduh bam.”
“U Myntri Rangbah u la pyntikna ïa ki nongshong shnong ba yn pynbiang ïa ka jingpahara, hynrei um shym la batai shai lano ka jingïakren bad ka Sorkar Assam lem bad ka Karbi Anglong Autonomous Council kan long,” u la bynrap.
