Shillong, Risaw 14
Ka Langsning FC ka la pynliem noh ïa ka Malki SC da 5-0 kol ha ka jingïalehkai kaba khatduh jong ka ha ka lympung ïalehkai Shillong Premier League 2025 ha ka sngi Ba-ar ha SSA Stadium kaba ha First Ground, Polo.
U Samuel Phawa (35 & 40) u la thep ar kol, katba ïa kiwei pat la pynbud da u Donlad Diengdoh (74) bad Nelson Rymbai (84) lem bad kawei kaba la ïarap pynthep da u rangïalehkai ka Malki u Pynkhlaiñbok Wahlang (90+4) hashwa ba kut ka jingïalehkai.
Kumta da kane ka jingjop, ka Langsning FC ka la ïoh ban khur 20 point ba kynthup ïa ki 6 sien ki jingjop, ar sien ki jingïakhaid bad ban shah rem arsien.
Da kane jingjop, ïa mynta ka Langsning FC ka la shong halor duh jong ka miej ïakheiñ point jong kane ka lympung, tangba ka kynhun kaba bat ruh ïa ka nam kum ka lahduh ka Shillong Lajong FC kaba la khur mynta 18 point, ka dangsah sa kawei ka jingïakhun ba kan pyndep, bud pat sa ka kynhun ïalehkai ka Mawlai SC kaba la khur 15 point bad dang sah sa artylli ki jingïakhun.
Lada phai pat sha ka kynhun ïalehkai jong ka Malki, ka nam rem ka la pynlong ïa ka ba kan don ha ka kyrdan kaba khyndai hadien ba ka la lah ban khur tang 6 point, bad sah satang kawei ka jingïa-khun ba kan pyndep.
Da kumta wat lada ka Langsning FC kan nym lah ban kynjoh sha ka thong ba kan rah ïa ka nam lahduh kane ka lympung, hynrei kan neh ha ka kyrdan kaba lai, kaba lehse kan pynhun pat ïa ka mynsiem ki nongpynïaid lada ïa nujor bad ka samoi ïalehkai u snem uba la dep.
Ka jingïalehkai ha ka sngi Balang kan long hapdeng ka Laitkor SC pyrshah ïa ka Sawmer SC ha ka por 4:30 nohphai sngi.
