New Delhi, Risaw:
Katba ka jingiakren ïasuk ha Middle East ba la ïalam da u President jong ka US, u Donald Trump, ka dang ïaid shakhmat bad ka jingïateh kular ban pynkut noh ia ka thma hapoh Gaza, kaba la paw pyrthei hadien ba ka Hamas ka la pyllait noh ïa ki 20 ngut ki nongshah rahbor kiba dang im, ka jingjia kaba sngewsih ka la buh ïa ka jingdum halor kane ka jingjop. La pynphai biang ia ka met jong u Bipin Joshi, uba dei u samla pule Hindu na Nepal, uba la shah rahbor ha ki seng lehnoh Hamas palat ar snem mynshwa, ha kaba la pynphai biang sha Israel.
U Ambassador jong ka Nepal sha Israel, u Dhan Prasad Pandit, u la pynthikna sha ka lad pathai khubor jong ka Nepali, ka Republica, ba ka met jong U Joshi, ka don ha lynti ban leit sha Tel Aviv, ha ka miet jong ka sngi Nyngkong.
“Ïa ka met jong U Bipin Joshi, la aiti sha ki bor jong ka Israel, da ka Hamas bad mynta la rah ïa u sha Tel Aviv,” ong u Pandit.
U nongaiktien jong ki shipai Israel, u Effie Defrin, ula pynthikna ruh, ba ka Hamas, ka la pynphai biang ïa ki metïap jong ki saw ngut ki nongshah rahbor, ba kynthup ïa ka jong u Joshi, sha ka kti jong ka Israel.
Yn pynlong ia ka jingtest DNA shwa ban pynphai biang ia ka met iap sha Nepal, ha kaba ia ki jingleh niam ba khatduh yn pyndep ha Israel ha ka jingiatreilang bad ka tnad treikam jong ka Nepal.
Ka jingleit jong u Joshi na kawei ka shnong rit ha Nepal sha ka jaka ba don ka jingïakynad jong ka Gaza ka la sdang ha u bnai Naiwieng 2023, ha kaba u la ïasoh bad ki 16 ngut ki para samla pule na ka bynta ka prokram pule bad trei ha ka rep ka riang ha Kibbutz Alumim, hajan khappud Gaza. Ka prokram ka thmu ban ai jinghikai da ki kti ha ki rukom rep jong ki Israel – ka lad kaba shisien ha ka jingim jong ki samla pule.
Kata ka kabu ka la kylla long kaba sngewsih ha ka 7 tarik u Lber 2023, haba ka Hamas ka la pynlong ïa ka jinghiar thma kaba heh ïa ka thaiñ shatei lam mihngi jong ka Israel. Ki siren ki la sawa, bad ki samla pule ki la leit rieh ha ka jaka rieh bom. Hadien katto katne por, la bthei ki jingsiat suloi bad ki jingbthei. Ki lehnoh jong ka Hamas ki la pynbthei bom shapoh katei ka jaka rieh tngen – uwei u la bthei, kaba la pynmynsaw ia ki katto katne ki samla pule, hynrei u Joshi u la leh mardor, da kaba shim ia u bom uba ar bad u la bret ia u shabar shwa ba un bthei, kaba la pynim ia ki jingim.
Hadien kata la kem ia u da ki riew suloi jong ka Hamas bad la rah ia u sha Gaza. Ha ki sngi kiba bud, ki video ba la pynmih da ki shipai Israel, ki la paw ba ki pyni ia u Joshi, ba la shah rong shapoh Shifa Hospital jong ka Gaza, kaba dei ka jingiohi ba khatduh eh jong u, ba u la tip ba u dang im. Ki paralok bad kiba haïing hasem jong u ki la bat skhem ïa ka jingkyrmen ba un wan phai biang, katba ka kmie bad ka para jong u ki la leit sha Israel bad sha America ban kyrpad ban pyllait noh ïa u.
U Bipin Joshi un dap 25 snem ha ka 26 tarik Lber.
Ha kane ka taiew, katba ki nongïakren ïasuk ki dang ïaroh ïa ka jingïaid shaphrang ha ka jingïateh kular ïasuk ha Gaza, ka jinglong jong u Joshi ka la long kum ka jingpynkynmaw kaba sngewsih ïa ki dak kiba jylliew kiba la iehnoh da ka jingïakynad ha kylleng ka Middle East.
