Shillong, Risaw 14
Ka All Meghalaya Primary School Teachers’ Association (AMPSTA) ka la rai ban ïeng skhem ba ïa ka post Deficit ym dei ban pynduh pyndam, wat lada ki nonghikai Deficit kin shongthait, ki ban bteng ïa ka jingshakri ki dei ban ïoh beit ha ka Deficit sanction post.
Ïa kane ka rai, ka AMPSTA ka la shim ha ka jingïa shong pyrkhat kam ha ka 11 u Risaw 2025, ba la long ha Conference Hall jong ka Orchid Inn, Thadlaskeiñ, Jowai, West Jaiñtia Hills.
Ha kane ka jingïa shong pyrkhat kam, ka Association ka la rai ban ïeng skhem ba ïa ka post Deficit ym dei ban pynduh pyndam.
Ha ka kyrwoh ba la phah ka Association ka la ong ba ka report jingwan jong U General Secretary na Delhi, Haryana, Assam ba ïadei bad ka TET, ka Sorkar Jylla ka dei ban bud nuksa ban leh bad pyntrei kam ïa kaei kaba kiwei ki Jylla ki pyntrei kam. Kata kum ka Haryana, kiba passed ïa ka HTET, Assam, ATET, Delhi DTET, ki District DEEET, SET.
Ka Association ka la rai ruh ban ai jingkyrshan ïa ka AIPTF kaba ujor ha Supreme Court na ka bynta ka TET bad ka la noh synñiang ruh haduh T.2 lak sha ka AIPTF.
Ka CPF/CPS ki nonghikai kiba la thep ha State Bank Laitumkhrah Branch. Ban bud dien halor ka jingthoh ba la ai sha U Director ba kito kiba la thep lut ïa ka CPF/CPS ki dei ban ïoh ïa u Personal Account Number.
Nalor kata, ban bud dien ïa ka GPF jong ki nonghikai kiba dang dei ban ïoh, bad ïa kane ka kam la shañiah ha u President, General Secretary, Babu Lukas Jat, Babu Tonyfort War, bad Kong Serinda Rymbai.
Shuh shuh ka Association ka la rai ban ïatreilang bad ka tnad pule puthi ha kaba ïadei bad ka MEGHSIMS Portal, ka Recognition Code.
Ka la pynpaw ruh ban pyrshah ïa ka One UDISE, One Management bad One Account. Tad ynda haba ka tnad pule puthi kan ai da ka Guidelines kaba biang bad kaba shai bad hangta yn sa shim rai.
Ka Association ka la jied ruh 15 ngut ki dkhot ba kin ïa kynduh bad u Myntri ka tnad pule puthi, U Commissioner Secretary Education bad Director School & Education and Literacy, ban ïoh jingshai ha kaba ïa dei bad shibun ki jingdawa.
Shibun ki kam kiba ïadei bad ka jingpynkhlaiñ shuh shuh ïa ka synjuk, ki jingpynkhreh na ka bynta ka Conference, bad ruh ka jingjied ïa ki Council Members na ka AMPSTA sha ka AIPTF, ka jingïadei bad ka riti synshar jong ka Synjuk, la pyndep ha kane ka Executive Committee.
