Shillong, Risaw 14
Ka Meghalaya Commercial Truck Owner and Driver Association (MCTODA) ka la rai ban pynlong noh da ka jingïakhih kaba khlem buh por hadien ba kum ki trai bad ki nongñiah trok ki la mad bad ïakynduh ïa ki jingeh kiba bun.
ïa kane ka rai ban pynlong noh da ka jingïakhih la shim ha ka jingïalang jong ka MCTODA kaba la long ha ka 14 tarik u Risaw, 2025 ha Laitkor, bad ïa kane ka jingïakhih la rai ban sdang bad pynlong naduh ka por 9 baje mynstep jong ka 27 tarik u Risaw 2025. Kane rai ka Association ban pynlong da ka jingïakhih ka dei halor ki jingeh ki trai bad ki nongñiah trok na ri lum Jaiñtia ba ki ïakynduh jingeh namar ka jingbym burom ki trai karkhana pynmih dewbilat.
U nongaiktien ka Meghalaya Commercial Truck Owner and Driver Association u Bah Wanshuwa Nongtdu haba kren sha ki nongthoh khubor u la ong ba ka Association ka la phah jingthoh la bunsien sha ki trai karkhana pynmih dewbilat ba kin ai kam ïa ki Khasi khamtam ha ka ban kit dewbilat bad kiwei ki kam, hynrei ki khlem ïoh jubab eiei bad na kine ki jingeh, ka jingïalang ka la shim da kawei ka rai ban pynlong da ka jingïakhih ba khlem buh por.
U Bah Wanshuwa u la buh ka jingkyrpad ïa ki dukan, ki nongdie ha ki jaka bapher-bapher bad ki nongpyndonkam dewbilat ba kin pynbiang lypa ïa ka jingdonkam jong ki shuwa katei ka tarik ba ka Association ka la pyntip khnang ba kan ym don kano-kano ka jingbuh jingeh ïa ki bad ki nongpyndonkam tang namar katei ka jingïakhih jong ki, kumjuh ruh ba kin ai jingkyrshan lang ha katei ka jingïakhih jong ki ba kan long kaba jop.
