Shillong, Risaw 14
Ka North Eastern Hill University Teachers’ Association (NEHUTA) ha ka Sngi Ba-ar ka la pynbna ïa ka rai jong ka ban phah ïa ka kynhun sha New Delhi na bynta ban sei madan ïa ki “kam bamsap” kiba la kynnoh pyrshah ïa u Vice Chancellor (VC) ka North Eastern Hill University (NEHU), u Prof. Prabha Shankar Shukla, ha ryngkat ka jingïatreilang bad ka Manipur Tribal Development Corporation (MTDC), Imphal, halor ki projek ba la pyntrei ha Tura Campus jong ka skulbah.
Ïa kane ka rai la shim ha ka jingïakhih kaba la pynlong hakhmat ka ophis treikam jong u VC ha ka Sngi Ba-ar, kum shi bynta jong ka jingïakhih kaba dang ïaid jong ka NEHUTA pyrshah ïa ki bor pynïaid ka NEHU.
Haba ïakren bad ki nongthoh khubor, u President ka NEHUTA, u Prof. Lakhon Kma u la ïathuh ba kane ka kynhun kan ïakynduh ïa ki ophisar jong ka tnad pule puthi ka Sorkar Pdeng ban pyni ïa ki sakhi-sabut halor ka jingkynnoh bamsap, ka jingbym beit ha ka liang ka pisa-tyngka, bad ka jingwan tuklar ha ki kam pynïaid da u Prof. Shukla.
“Ngi la shim ïa ka rai ban leit sha Delhi, bad hapoh shi taïew ne shiphew sngi, ngin ïakynduh ïa ki ophisar jong ka tnad ban batai kumno ka jingpynbeit ba la leh na bynta ban wanrah ïa ka jingïaid beit ïaid ryntih ha NEHU ka la shah rem noh shi syndon namar ka jingwan tuklar jong u Prof. Shukla,” ong ka seng.
U Prof. Lakhon Kma u la kynnoh ba u Prof. Shukla u la mynjur ïa ka pisa projek sha ka MTDC khlem da pyndep ïa ka kam, da kaba kynnoh ba la pyllait T.82 lak hapoh 15 sngi naduh ba la pynmih ïa ka ‘Work Order’, watla ka projek ka dang sah khlem pyndep.
“Hadien ba la shim ïa ka pisa, ka MTDC ka la pan por shuh na ka bynta ban pyndep ïa ka kam. Kane ka pyni shai kdar ïa ka jingïasylla bad ka kam jong ka ‘commission and omission’ hapdeng u Prof. Shukla bad ka MTDC,” la kynnoh ka NEHUTA.
Ka seng ki nonghikai ka la kam shuh-shuh ba u VC u la pep na ka kam la 333 sngi, hynrei u dang ïai bteng ban sei ïa ka tulop kaba pura.
“U la jah la jan shisnem, hynrei khlem ka akor ka burom u dang sei tulop katba ïa ki kam jong u la pyndep da ki Pro-Vice Chancellor jong ka Shillong bad Tura,” ong ka seng da kaba ñiew ïa kane kum ka “jingpynsyrwa kai ïa ka pisa paidbah.”
U la kynnoh ba ka tnad pule-puthi ka Sorkar Pdeng ka khapbrib khmat haba ïadei bad kane ka kam, da kaba ong ba kum kane ka jinglong-jingman ka long ka “bym pat ju ïohsngew ha kano-kano ka bynta jong ka ri.”
Ka seng ka la pynpaw ruh ïa ka jingbitar ba wat hapdeng ki jingkular jong ka tnad ha ka jingwan jngoh jong ka ha u bnai Jymmang ba u Prof. Shukla un ym pynïaid shuh ïa ki jingïalang Executive Council (EC) ka NEHU, hynrei u ïai bteng ban tuklar ha ki kam ki jam jong ka skulbah.
“Ka tnad ka la ong ha ngi ba man la ka por ba don ka jingïalang jong ka EC ne ‘Academic Council’, u VC un shong shuti. Hynrei u dang ïai bteng ban pyrshah ïa kata ka jingsngewthuh, kaba long pat ka kam shet kylla”, la ong u President ka NEHUTA.
Ki nonghikai ki la pynpaw biang ïa ka jingpyrshah jong ki ïa u Prof. Shukla u ban long u nongpynïaid ïa ka jingïalang jong ka EC ban wan, da kaba kynnoh ba u thmu ban pyndonkam ïa ka ban “pynlong aiñ” ïa ki jingmang projek ba la ai sha ka MTDC, Imphal.
“Baroh ki kam tei jingtei kiba heh ha NEHU la pynïaid da ka Campus Development Department (CDD) jong ngi. Ym shym la don kano-kano ka daw ban ïaid lait ïa ka bad ban aiti ne ‘outsource’ ïa ki projek sha ka MTDC, lait noh tang na bynta ki jingmyntoi shimet,” la kynnoh u Prof. Lakhon Kma.
U la ong ba ka jingthmu jong kane ka jingïakhih ka long ruh ban khring ïa ki jingpynleit jingmut sha ki jingeh kiba kham heh jong ki nonghikai, kynthup ka jingpynslem ban kyntiew kyrdan ïa ki (nonghikai), ka jingbym pyntreikam ïa ka Career Advancement Scheme (CAS), ka jingthung ba khlem pyrkhat ïa u Dean, ka jingpynkheiñ ïa ki kyndon pisa-tyngka, ka jingsiew ïa ka bai sumar (Medical Reimbursement) ba dang sahteng, bad ka jingbym kitkhia haba ïadei bad ki jaka sah ki nonghikai.
Ka jingïakhih ha ka Sngi Ba-ar ka la long hadien jong ki rai ba la pdiang da ka NEHUTA ha ki jingïalang ba la long ha ka 25 tarik u Nailur bad 8 tarik u Risaw, kaba pynpaw ïa ka jingbym sngewhun kaba nang jur hapdeng ki nonghikai halor kaei kaba ki la ñiew kum ka jinghiar jong ki bor pynïaid hapoh ka jingïalam jong u Prof. Shukla.
Ka NEHUTA ka la pyntikna ba kan bteng ïa ka jingïakhih jong ka tad haduh ba ka tnad pule-puthi kan tuklar bad wanrah biang ïa ka jinglong khuid bad jingkitkhlieh ha ka jingtreikam jong ka NEHU.
