Ka rilum Khasi Jaiñtia ka dei kaba la ju tip kum ka ri tip briew tip Blei, tip kur tip kha bad ka tip burom ka tip akor hynrei kat nangïaid ki por bad ha kane ka juk kaba mynta, kine kiei-kiei baroh imat kim treikam shuh. Ym don shuh ka jingtip briew ne ka tip Blei, ka jingïatip kur tip kha ne ka burom ka akor. Ka juk ka la kylla bak-ly-bak bad haba peit ïa ka imlang sahlang ruh ka la ïapher bak-ly-bak. Kam don shuh kata ban dang ïa lehraiñ ne ban ïa burom ïa ki tymmen ki kro ne ïa kiba la rangbah briew. Kat shaba phai, la sakhi beit ba imat la synshar kata ka jingsngew ha nga beit bad kam don shuh kata ban ïa pyrkhat para briew ne ban don shuh kata ka mynsiem sngew synei.
Dang ha kine ki khyndiat bnai, la ïoh ban sakhi ïa ki jingjia kiba pynpar ñiangkhriat bad pynsuhjer ym tang ïa ki kmie ki kpa hynrei ïa ki nongshong shnong jong ka rilum Khasi Jaiñtia lyngba ki kam shah pynïap jong ki khynnah khyllung, ki jingsniew na ka tuh ka thiem, ki kam thmu rahbor bad ruh ka jingshim jong ki katto katne ïa la ka jong ka jingim. Ka jinglong shngaiñ ha ka ïaid ka ïeng ha ki shnong ki thaw ruh kam don shuh. Kum ki kmie ki kpa ki la don beit ha ka jingtieng jingsmiej khamtam lei haba ki khun ki mih na la ïing ban leit sha ki jaka pule, ne sha kino-kino ki jaka. Ngi ju kynmaw ha ki por kiba la leit, kiba bun ki khynnah ki ju shah mai bad rah dieng ne siej ha la ki jong ki kmie ki kpa, lada ki shong khop tang ha la ïing, ha kaba la ong ba ki dei ban mih ban leit ïalehkai bad ki paralok shabar phyllaw bad wat lada ki khun ki leit ban ïalehkai sha ki madan ne ki leit ïasum ïasleh sha ki pung ne ki wah ruh ym ju don satia kata ka jingkhuslai mynsiem hynrei ka dap beit da ka jingkmen ba haba ki khun ki khih ki ksar ki ïoh ruh ïa ka met ka phad kaba koit ba khiah. Hynrei mynta kam long shuh kumta, ki khun ki la hap ban pynlut ka por ka sngi tang ha ki saw kynroh jong ka ïing bad kiba bun ki la pynlut por tang ha ki mobile ne telebishon.
Kane ka jingkylla ka dei namar ka jingjur palat jong ki kam sniew kiba la kynrei ha kine ki sngi kiba mynta. Ym don jingshngaiñ shuh bad haba ki mih shabar ïing ruh la shu bun sa tang ki jingkhuslai. Ki briew mynta kim don shuh ïa kata ka jingïasngew para briew bad ïa kane lah ban sakhi na ka jingjyllei ki kam sniew. Balei haduh katne, hato dei na ka jingbym don por shuh ban sneng ban kraw ne ban ai laitlan palat ïa la ki khun ki kti. Kumba ka long mynta, la shem beit ba ka por ka la long kaba lyngkot bha, ju ïoh sngew beit ïa ka kyntien ba ym don por shuh ban leh eiei. Ka dei shisha ka por kaba eh bha ïa ki kmie ki kpa hynrei wat hapdeng ki jingeh kiba bun bad ka jingbym don por hynrei ka jingieit pat ka long skhem bad dei na kane ba wat haba mih na la ïing ban leit sha ki kam ki jam, ka mynsiem ka khuslai beit haba pyrkhat pat ïa ki khun.
Ka jingmih jong ki jingjia ba dang shen, halor ka jingshah pynïap jong ki khynnah khyllung, sa shisien ka la pynkhih mynsiem biang ha ki briew ïa ka jingmih biang jong ki menshohnoh. Kane ka jingkhih bad jingbitar jong ki paidbah halor ki jingjia ba dang shen ne kiba la leit, ka la nang wanrah ruh ïa ka jingbym shngaiñ ban ïa rung ïa mih na kawei ka shnong sha kawei pat. Hooid ka long kaba donkam ban peitngor ha la ki jong ki shnong ki thaw hynrei ym dei pat ban shim ha kti ïa ka aiñ. Haba lap ïa ki riew phylla ne ki briew bym ju ïohi ha ki shnong ki thaw, dei ban bat bad ban kylli pyrthew bniah, balei ki wan sha kane ka shnong, ki donkam ïano ne ki mut leit shano.
