Jowai, Risaw 14
U Teddyson Bang bad Samlangwao Suna ki la khyrwit da ki hat-trick na ka bynta ban pynlong ïa ka Evergreen SC ba kan jop haduh 10-0 kol ïa ka Wahshangiar ha ka lympung ïalehkai 1st Division Football Tournament ba la pynïaid da ka Thadlaskeiñ Sports Association (TSA).
Kane ka hat-trick jong u Teddyson Bang ka la wan lyngba ki saw kol kiba u la thep ha ka minit 32,51,61 & 78, katba u Samlangwao Suna u la thep ha ka minit 49, 52 & 71. Ïa kiwei pat ki kol la thep da u Riskhem Shylla (36) bad u Evan Ryngkhlem (56 & 77).
Ha ka jingïalehkai kaba bud, ka Nongkhroh Mawsiang ka la pynliem ïa ka Jalapang SC da 2-1. Ïa ki kol ka Nongkhroh Mawsiang la thep da u Snowel Kharsati ha ka minit kaba 4 bad u Pyndapbiang Myrboh (64), katba ïa ka shi kol jong ka Jalapang la thep da u Hopefull Shullai (17).
Ka jingïalehkai ha ka sngi Balang kan dei ka final final jong ka 2nd Division hapdeng ka Maïa Club Umjalasiaw bad ka Bamkamar SC ha ka por 1.30 baje nohphai sngi.
