Shillong, Risaw 15
Ka Sorkar Jylla ka la kyntu ïa ki trai shnong jong ka shnong Lapangap kaba ha West Jaiñtia Hills ba kin kiar na ki kam ot kba khnang ban lait na ka jingjur ki jingïakynad ha shi lynter khappud jong ka Meghalaya-Assam.
Kane ka la wan jia shisngi hadien ba ka kynhun na Lapangap hapoh ka lama jong ka Joint Action Committee (JAC) ka la ïakynduh ïa u Myntri Rangbah ka Jylla, u Conrad K. Sangma, ban pan jingbit na bynta ban ïaid shakhmat bad ka jingot kba.
“Watla ka jingot kba ka long kaba kongsan na bynta ki nongrep bad ki paidbah hangtei, hynrei ka jingshngaiñ bad ka jingïada ka long kaba khraw tam ha ngi. Watla ngi lah ban pynbiang ïa ka bor briew ban pahara, hynrei kine ki jait jingjia kim hap pura hapoh ka jingkhmih jong ngi. Ngim kwah ba kano-kano ka jingjia kaba sngewsih kan jia hangtei, kaba lah ban pynjur pynban ïa ka jingïakynad hapoh ka thaiñ. Kumta, ban lait na kano-kano ka jingjia kaba sngewsih, ngi la kyntu ïa ki nongshong shnong ba ngi dei ban kiar (na ki kam ot kba) ha kum kane ka por, bad ngi dei ban long kiba ïaishah,” ong u Conrad ha ki nongthoh khubor ha ka Sngi Balang.
U Myntri Rangbah u la ong ruh ba katei ka jingjia ba sngewsih ka la pynkyndit shi kat dei ïa ki pulit ka Meghalaya bad Assam, ba ka la nang pynjur ïa ki jingïakynad ha katei ka thaiñ.
“Ym shym la khmih lynti ba ka jinglong-jingman kan ïaid sha kane ka liang. Ki la don shibun ki jingïakren kiba tei hapdeng ki nongshim bynta bapher-bapher bad ngi la khmih lynti ba ngin lah ban ïaid shakhmat da kaba suk ba saiñ hynrei kaba sngewsih ka long ba kane ka jingjia ka la wan jia bad kumba nga la ong, kane ka dei kaei-kaei kaba wat ki pulit Assam bad ki pulit Meghalaya kumjuh ki la kyndit ha kaba ka jingïakren ka dang ïaid, katto-katne ka jingeh ka la don hangta – kane ka jingjia ka la jia jngai na ka jaka ba ki briew ki la ïalum lang,” u la ong da kaba bynrap, “Kumta, ngi dang pyrshang ban sngewthuh kumno kane ka la jia, hynrei katba kata ka dang jia, kane ka lah ban ym dei ka por kaba biang ban pynshit shuh-shuh ïa kiei-kiei.”
U Myntri Rangbah u la pyntikna ba ka Sorkar ka dang trei ha ki kyrdan bapher-bapher ban pyrshang bad wad ïa ka lad jingpynbeit ban weng ïa kane ka jingeh.
“Ngin kyrpad ba ngi dei ban kiar bad ban ai lad ïa ka jingsuk ban wanphai. Ngi dang ïakren bad ki nongshim bynta bapher-bapher ban peit la ngi lah ne em ban wad ïa ka lynti ban pynbeit ïa kane ka jingeh bad ban trei halor kane. Haduh kata ka por, kan long kaba bha tam ba ngim dei ban ïaid shakhmat bad kano-kano ka kam kaba lah ban wanrah pat ïa kano-kano ka jingïakynad kaba kham jur ha kaei ka jaka,” la ong u Conrad.
“Hadien ba ngi la ïakren bad ki (kynhun JAC), ki paidbah ki dang thrang bad ki la kyntu ïa ngi ban ïakren bad ki paralok lem bad ki nongïalam sha shiliang khappud, bad ka Jylla ba marjan bad peit la ngi lah ne em ban wad ïa ka lad, kaba kumba nga la ong, ngi dang buddien bad ngi dang pyrshang katba lah bad ki ophisar bapher-bapher, ki nongïalam saiñ pyrthei bad ki bor pynïaid ki dang trei ha ki kyrdan bapher-bapher bad ki dang pyrshang ban kynjoh ïa kane,” u la bynrap.
Haba kylli, u Conrad u la ong, “Tang lada ngi ïoh ïa ka jubab kaba manbha na sha shiliang ba to ngin pyrshang ban pyndep shuwa ïa kane ka kylla bad ban ailad ïa ki paidbah ban ot kba, tang ynda ngi la don ka jingïasngewthuh jingmut lang, ngin sa lah ban ïaid shakhmat. Haduh kata ka por, watla ka jingot kba ka long kaba kongsan bha na ka bynta ki briew jong ngi hynrei kumba nga la ong ka jingim bad ka jingïada bad ka jingshngaiñ ka long kaba kongsan tam ïa ngi.”
