Shillong, Risaw 15
Ka Sorkar Jylla ka la bthah ïa ka tnad pule puthi ban wanrah da ka ‘Action Plan’ na ka bynta ban pyntreikam ïa ki jingai jingmut ka Meghalaya State Education Commission (MSEC).
Haba pyntip ïa kane hadien ka jingïalang ka kynhun Myntri, u Myntri Rangbah u Conrad K Sangma u la ong ba ka jingai kaiphod jong ka Meghalaya State Education Commission (MSEC) la wanrah ha ka miej ka kynhun Myntri ban ïakren sani bha ïa ka.
“Ïa ka kaiphod ka MSEC ka kynhun Myntri ka la pdiang, kumta ka tnad pule puthi ka la bthah ban ïaid kawei pa kawei ka jingai jingmut bad ban wanrah ïa ka jingsaiñdur kaba lah ban treikam bad kaba ïaid shakhmat” la ong u Conrad sha ki nongthoh khubor.
“Hadien kane ka kynhun Myntri kan shim rai pat kumno ban ïaid shakhmat ha kaba ïadei ban pyntreikam ïa kaiphod jingai jingmut ba la phah da kane commission,” la ong u Conrad.
Ka Meghalaya State Education Commission ka dei kaba la thaw ban ai jingmut, ïa ki lad ki lynti ban wanrah ïa ki jingai jingmut ban pynkylla ïa pule puthi ha ka Jylla, kaba ïadei katkum ka National Education Policy (NEP) 2020.
Ka kaiphod ka MSEC ba la dep phah, ka batai ïa ki jingai jingmut halor ki bynta ba kongsan kum ka jingpynïasoh ïa ki skul, ki jingkylla ha ka jingpule ba kham shalor, ka jingai jinghikai ïa ki nonghikai, ka jinglehbha jong ki khynnah pule bad kiwei-kiwei.
