Jowai, Risaw 15
U District Magistrate jong ka West Jaiñtia Hills District u AK Singh, IAS u la pynjari ïaka korphiw kaba ar sngi katkum ka Section 163 BNSS ha ka 16 bad 17 tarik Risaw ha baroh kawei ka thaiñ khappud ka Assam-Meghalaya ba hap hapoh u pud u sam jong ka district.
Kane ka hukum ka la khang pyrshah ïa ka jingïaid ki briew ha ki jaka khappud jong ka Assam-Meghalaya baroh kawei hapoh ka West Jaiñtia Hills District.
La khang ïa ka jingïalum briew 5 (san) ngut ne palat. Ka jingrah ne jingpyni ïa kano-kano ka tiar ba la shna ne ban pyndonkam kum ki tiar ïaleh ne kano-kano ka tiar kaba lah ban pyndonkam da kaba pynmynsaw pyntieng ne pynmih ïa ka jingkulmar paidbah ha baroh sawdong jong ki jaka khappud Assam-Meghalaya baroh kawei.
Lah ban pynkynmaw ba na ka liang ka Dorbar Elaka Shilliangmyntang ka la dep ban dawa na ki bor pynïaid District jong ka West Jaiñtia Hills ban pynbiang ïa ki bor pahara kiba khlaiñ na ka bynta ban ai jingïada ha ka jingot kba jong ki nongshong shnong ka Lapangap kaba ki la buh ban pynlong ha ka 16 bad 17 tarik mynta u bnai. La pyntip ba ki nongshong shnong jong ka Lapangap kila pynkhreh ban ot biang ïa u kba ha ka 16 bad 17 tarik mynta u bnai bad ha kaba ki la maham lypa ba lada ka Sorkar kam lah ban pynbiang ïa ki lad jingïada, ba ki nongshong shnong ka Elaka Shilliangmyntang ryngkat bad ki nongshong shnong jong ka Lapangap kim banse ban shim ïa ki lad jingïada kiba donkam, kynthup ban rah ïa ki tiar ïaleh kiba don laisen, ban ïada ïalade bad ïa ki jingthung jingtep bad kino-kino ki jingma kiba lah ban jia, bad ha kaba ka Sorkar kan hap ban shim ïa ka jingkitkhlieh.
