Nongstoiñ,Risaw 15
Ha ka sngi Balang ka Nongkharai Presbyterian Higher Secondary School kaba don hapoh ka shnong Umsohpieng jong ka Mawshynrut Civil Sub-Division kala ïoh ban plie ïa ka ïing building kaba thymmai, ïa kaba la bei pisa lyngba ka NEC ha kaba u Myntri Rangbah ka Jylla u Conrad K Sangma u la long u kongsan.
Haba pynpaw ïa ka jingïaid lynti jong ka skul, ki bor pynïaid katei ka skul kila pynkynmaw ba ïa ka skul la sdang bad seng ha u snem 1966 bad kila pynkynmaw ruh ba dei ha u snem 1988 ka skul ka la ïoh jingïarap nyngkong ban tei ïa ka building na u (L) PA Sangma, uba dei ruh u Myntri Rangbah ka Jylla bad kumjuh ruh u Myntri ka tnad pule puthi ha kito ki snem.
U Conrad K Sangma haba kren kum u kongsan ha kane sngi u la ong, ha ki shi snem shiteng kiba la leit ka Jylla Meghalaya ka la ïaid ïa ka lynti kaba jrong bha bad ha kine ki jingïaid lynti shibun ki jingeh bad jingtynjuh hynrei ka Sorkar ka la kren shai ba haba ka shim ïa kano-kano ka rai ne ki sienjam ka dei ban buh shwa ïa u paidbah ka Jylla hakhmat.
U la ong ruh, shibun kiei-kiei kiba ka Sorkar ka la lah ban leh khamtam ha kaba ïadei bad ki kam pynroi la ka long ban pynïoh ne pynbha ïa ki surok, ban pynbha ïa ka tnat ka koit ka khiah nalor kiwei-kiwei hynrei kam mut pat ba la kut hynrei dang don shibun kiba hap ban leh bad ban pyndep khnang ban nang kyntiew shuh-shuh ïa ka Jylla.
U la ong, watla ka Sorkar ka pynlut bun ha ka pule puthi hynrei ka jingmih pat kam long katkum ka jingkhmih lynti bad ka don shibun ki daw bad u la ong ruh ba um kwah ban kynthoh ïano-ïano namar ka pule puthi kadei ka sobjek kaba ïar bad kaba eh bad kyllaiñ bha ban ïakren.
U la ong ba tang ha ka pule puthi ka Sorkar ka pynlut haduh T.3654 klur bad na kane kumba 2 hajar klur duna la pynlut tang ban siew tulop ïa ki nonghikai bad 917 klur la pynlut manla u snem na ka bynta ban siew tulop ïa ki nonghikai deficit bad adhoc, 684 klur na ka bynta ki skul Sorkar bad 366 klur na ka bynta ki skul SSA bad kine ki jingkheiñ ki dang ïai kiew na kapor sha kapor.
“Ngi don haduh 14,582 tylli ki skul bad 55 hajar ngut ki nonghikai bad ngi don haduh kumba 20 jait ki skul bad kumba 25 tylli ki kynhun lane Association jong ki nonghikai,” ong u Myntri Rangbah da kaba u la bynrap ba tang ha kawei ka shnong kidon laiphew jait ki skul ba la pynïaid da ki kynhun bapher-bapher kaba pynlong ban duna khynnah ha ki skul bad bun ki nonghikai bad kane ka la ïaid palat 50 snem mynta bad ka jingdon ki skul ba lai phew jait ka wanrah jingeh ïa ka Sorkar hynrei watla katta ka Sorkar ka dang pyrshang ban pynbeit.
Ha kaba ïadei bad katei ka skul kumba u kpa jong u, u (L) PA Sangma u la don bynta ban noh synñiang, u Conrad u la kular ruh ba un ïai bteng ban pynïoh shuh shuh ki lad jingïarap na ka bynta katei ka skul ïa kaba un sa shong ban ïakren bad ïa pynbeit bad u MLA ka thaiñ uba dei ruh u Myntri Sorkar.
Ha kane ka sngi nalor u kongsan la donlang u Bah Methodius Dkhar uba dei u Myntri Sorkar ha kajuh kapor u MLA ka thaiñ, u RG Momin MLA ka Rambrai Jyrngam, u Bah Srally Rashir MDC ka Mawshynrut, u Bah Garod LSN Dyke Deputy Commissioner ka WKH, u Bikram D Marak Superintendent of Police ka WKH, u Bah C Andronal Lyngdoh Principal ka skul, ki riew rangbah ka thaiñ ki nonghikai ki khynnah skul bad ki kmie ki kpa.
