Mawkyrwat, Risaw 15
Ki kontraktor kiba pyntrei ïa ka skhim Jal Jeevan Mission (JJM) ha Mawkyrwat Division ha ka 15 tarik u Risaw, 2025 ki la leit ban ïakynduh ïa u Executive Engineer ka PHE Mawkyrwat Division, Bah K Nongbsap halor ka jingslem palat ban pyllait ïa ki bill wat hadien ba kiba bun ki kontraktor ki la pyndep hok ïa ki jingpyntrei jong ki ha ka por kaba biang.
U Bah FD Ramsiej, uwei na ki kontraktor haba kren sha ki lad pathai khubor u la ïathuh ba don ki kontraktor ki la pyndep ïa ki jingtrei la kumba ar snem bad don kiba la pyndep la bun bnai hynrei kaba sngewsih ka long ba haduh mynta kim shym la ïoh ïa ki bill jong ki bad kane ka la wanrah jngeh shibun namar ki don ki kontraktor kiba shu shim da ka ram na ki bank bad mynta la phah siew ïa ki.
U Bah Ramsiej u la ïathuh ba ka bill kaba sahkut bad kaba la dep ban phah sha Shillong baroh ka la kot sha ka T.48 klur tam bad u la ïathuh ruh ba kane ka dei tang ka bill kaba la dep phah bad ki bill ba khlem pat phah ruh ki dang bun.
Ha kaba ïadei bad kane ka jingeh, ki kontraktor jong ka thaiñ Mawkyrwat ki la rai ban leit ïakynduh noh ïa u Chief Engineer kumjuh ruh ïa u Conrad Sangma ban kyrpad ba kin sngew synei lem ban pyllait noh ïa ki bill jong ki namar ki la pyndep hok ïa ki kam kiba ki trei.
