Shillong, Risaw 15
Ka Hynniewtrep Youth’s Council War Jaiñtia Circle ka la leit ban pan jingshai na ka Director ka Directorate of Health Services ka Dr. J.S Momin halor ka jingbymdon Doktor ka Padu State Dispensary mynta la saw bnai tam.
Haba kren sha ki nongthoh khubor u Samla Youdahunki Shylla, President HYC War Jaiñtia Circle u la pynpaw ba ki la ïoh shibun ki jingujor na ki paidbah ka thaiñ haba ïadei ka jingkynduh jingeh jong ki namar ka jingbym don Doktor ha Padu State Dispensary naduh u bnai Jymmang, hadien ba u doktor u ba peit ïa katei ka Dispensary u la shah pynkynriah sha kawei pat ka jaka, katba haduh mynta ym don doktor satia ba wan bujli ha ka jaka jong utei u doktor ba la shah pynkynriah.
Halor kane u la ong, ki la ïoh ban kylli na ka Director, kaei ka daw ba pynlong ïa ka tnad ka koit ka khiah ban slem ban phah bujli doktor ha ka jaka jong utei uba la shah pynkynriah, ka Director ka la ïathuh ba ka daw ka jingslem ban phah doktor ha katei ka Dispensary ka dei namar ba ka tnad ka dang ap ïa ka thup kyrteng jong kiba pass doktor thymmai bad ka la kular ban shimkhia haba ïadei bad kane ka mat bad shen kan sa phah doktor ba thymmai ha katei ka Dispensary.
Shuh-shuh u la ong, ka jingbym don doktor ha katei ka Dispensary ka la ktah jur ïa ki paidbah ka thaiñ War Jaiñtia namar ki briew jong katei ka thaiñ ki dei kiba duk bad kiba im da ka bylla sngi, kim kotbor ban leit shim dawai sha kiwei ki Dispensary bad ki donkam palat ïa katei ka Dispensary, namar kata ka HYC ka dawa ba ka tnad ka koit ka khiah kan buh doktor noh mardor ha katei ka Dispensary bad lada ka tnad kam leh eiei halor kane ka jingdawa ha shuwa ba kut jong u bnai Risaw, ka seng kan khang khyrdep syndon ïa ka Padu State Dispensary.
Ka Padu State Dispensary ka ai jingshaki ïa ki shnong ba kynthup ka Padu, Khonglah, Nongbareh, Nongbareh rim, Amkoi bad kiwei-kiwei ki shnong.
