Shillong, Risaw 15
Ka Kynhun Myntri ka Jylla ka la mynjur ban pynskhem kam ïa palat 1,000 ngut ki nos kiba la shah thung kum ki ‘Ad-hoc’ katkum ki kam ba la mang ne ‘sanctioned post’ hashuwa jong u bnai Nohprah, 2007.
Hadien ba la pynïaid ïa ka jingïalang ha ka Sngi Balang, u Myntri Rangbah ka Jylla, u Conrad K. Sangma u la ong, “(Ngi la mynjur) ban pynskhem kam ïa ki ‘cadre’ hapoh ka ‘Meghalaya Nursing Service Appointment’ sha ka kam ‘Staff Nurse’ bad ‘Auxilliary Nurse’ bad ‘Midwife’.”
U la pyntip ba ka Sorkar ha u snem 2022 ka la pynskhem kam ruh ïa palat 3000 ngut ki nongtrei ba la shah thung kum ki ‘Ad-hoc’ katkum ki kam ba la mang ne ‘sanctioned post’ hashuwa jong u bnai Nohprah, 2007 katkum ka rai jong ka Supreme Court.
Hadien kane, la wanrah biang ïa ka thup kyrteng jong kiwei pat ki briew kiba dei hok bad kiba hap ha kata ka thup kyrdan sha ka Kynhun Myntri bad ïa ki ruh la pynskhem kam.
“Kumjuh, mynta ka tnad ka koit ka khiah ka la wanrah ïa ka thup kyrteng kaba la jan kot 1000 ngut ki nos kiba don ha kata kajuh ka thup kyrdan kiba la shah thung hashuwa jong u bnai Nohprah 2007 – katkum ki kam ba la mang, hynrei la leh ha ka rukom jong ka ‘Ad-hoc’. Kumta, da kaba bud ïa kajuh ka rukom bad kijuh ki kyndon kiba ïadei bad kiwei pat ki nongtrei kiba la shah thung ha kata ka rukom, ka Kynhun Myntri mynta ka sngi ka la rai ba ngin pynskhem kam ïa kito kiba la shah thung kum ki ‘Ad-hoc’ katkum ki kam ba la mang hashuwa jong u bnai Nohprah, 2007,” u la bynrap.
