Khliehriat, Risaw 15
Ki pulit ka Anti-Narcotics Task Force (ANTF) ka East Jaiñtia Hills ki la ïoh ban kem noh ïa arngut ki suba nongkhaïi drok kiba donkti ha ki kam khaïi drok ha kylleng ki Jylla na ka thaiñ Lumshnong, East Jaiñtia Hills District.
Ka jingïohkem ïa kine ki arngut ka la wan long hadien ba ka ANTF ka la pynlong ïa ka jingkhynra ha ka miet jong ka 14 tarik Risaw hadien ka jingïoh jingtip kaba thikna halor ka jingdon jong ki briew kiba wan da ka kali na Silchar, Assam ha ryngkat u drok.
Hadien ba la shimkhia ïa kane ka jingïoh khubor, ka kynhun ki pulit na Umkiang ka la pynlong ka jingpynap shrip bad talasi ha kaba ki la ïoh ban kem noh ïa ki arngut ki briew kiba la tip kyrteng kum u Abdul Rob Laskar ba ju khot sin u Munna (22) uba dei na Kabuganj Silchar, Assam.
Hadien da ka jingïarap ka ANTF, Meghalaya ki la ïoh ban kem sa ïa uwei pat u nongkhaïi drok uba la shah kem la bunsien ïa uba la tip kyrteng kum u Asif Wahlang uba dei na Hari Sabha Laban, Shillong.
Na kine ki arngut ki pulit ki la ïoh ban kurup santylli ki synduk sabon ba la thep ïa u drok uba don jingkhia kumba 60gram nalor kawei ka kali Hyundai Venue kaba don ïa u nombor AS01-EJ-8977.
Ki pulit ki la register case pyrshah ïa kine ki arngut hapoh thanad Lumshnong hapoh ka kyndon NDPS Act, bad ka jingtohkit ka dang ïaid shakhmat ban lap shuh ïa ki briew kiba donkti.
Na ka liang u Superintendent of Police (SP) ka EJH u Vikash Kumar u kyntu ïa kino-kino kiba don jingtip halor ki kam khaïi drok ba kin wan shakhmat ban ai jingtip sha ki pulit ha kaba yn buhrieh noh ïa ki kyrteng jong ki bad yn ai khusnam ruh ïa ki.
