Shillong, Risaw 15
U Bah Gowel Lyngdoh Mawphlang uba dei u kpa jong I heprit Insaphira Lyngdoh Mawnai kiba shong basah ha Nongrah Nonglum Brei Shillong, u la pynpaw ba um sngewlah ngeit ba u heprit un pynïap ïa i Insaphira Lyngdoh tang namar ba u ïaknieh biskit.
Haba buddien ïa ka jingïathuh u Superintendent of Police ka East Khasi Hills District Bah Vivek Syiem ba u heprit u la phla biang ba u la pynïap ïa i Insaphira namar ba u ïaknieh biskit kumta na ka liang u kpa bad ka kmie i Insaphira ki pynpaw ba kim pat sngewhun ïa kane ka jubab namar kane lei ka la pynkulmar jingmut ïa ki namar shiphang une u khynnah u batai ba u ïohi ïa ka Scorpio ïong, hadien u ong ba ka hap na kynroh bad mynta u ong ba ïaknieh biskit.
U Bah Gowel u la ïathuh ba ka kur Lyngdoh Mawnai kin sa shong pyrkhat ban ïaid biang shakhmat haduh ba une u heprit un da phla.
U la ïathuh ba ïa ki biskit ki ju buh ha u khiew ha almari kaba dei ha jaka bam bad ha katei ka step 14 tarik u Nailur u la wan rung hi ban shim ïa u biskit marie light rong stem ha ka por ba ma u bad ka kmie ki dang ïoh thiah. U la ong biang ba um lah ngeit ban ïaknieh biskit haba i Insaphira i dangrit bad ma u, u la kham heh.
Shuh shuh u Bah Gowel u la kyntu ïa ki pulit ban tohkit bniah namar ha kato ka step ba jah i Insaphira haba ki la ïawad une u heprit u la wan mih ha ïing tang kumba 10 minit eiei namar da dei ba u la pynïap kumno un wan mih kloi ha ïing haba ka jaka ba lap ïa ka metïap i Insaphira ka jngai kumba 100 metre na ïing ba sah.
U la ong biang ba une u heprit ruh u la leit wad lang haba jah i heprit Insaphira.
U la pynpaw ka jingsngew lyngngoh lada pynïap ha katei ka ïing kumno kim lap haba la leit wad ha katei hi ka sngi ba jah ha katei ka ïing ba dang shu shna.
Kumta u la kyntu biang ïa ki pulit bán tohkit bniah ban lap ïa kiba donkti ne haduh ba un da phla ïa kaba shisha namar ban batai shiphang da kawei shiphang da kawei ka pynsah umdum ïa kiba haïing.
