Nongpoh, Risaw 15
Uwei u nongñiah kali Pick-up uba la shoh khawiang, u la leit ban tyrwa da ka pisa T.100 ïa u Senior Superintendent of Police (SSP) ka Ri Bhoi, u Vivekanand Singh Rathore ha ka jingtalasi kali kaba la pynlong ha ka miet sngi Ba-ar ha ka surokbah National Highway 6 ha Mawdiangum, Ri Bhoi District.
Katei ka jingleit tyrwa pisa utei u nongñiah kali, kadei haka jingbteng jong ki pulit ka Ri Bhoi ban talasi ïa ki kali pynkheiñ aiñ, kiba buh jingma ym tang ïalade, hynrei wat ïa ki nongleit nongwan ruh kumjuh.
Kane ka jingbteng ki pulit Ri Bhoi ban khynra bad talasi naphang ïa ki kali kiba pynkheiñ aiñ ñiah kali kadei hadien ki jingjia ba sngewsih kiba la shim ïa ki bun tylli ki mynsiem briew tang namar ka jingñiah khlem-akor bad shoh khawiang u nongñiah.
Kumban shu kdew, ha kane ka jingtalasi kali ba la pynlong ha kylleng ki jaka bad bynta, da ki pulit jong ka Ri-Bhoi tang ha une u bnai Risaw, ki la ïoh ban daiñ kuna haduh kumba T.25 lak.
Kumba long ha ki jingtalasi kiba la dep, ha ka miet sngi Ba-ar ruh la lamkhmat da u Senior Superintendent of Police ka Ri Bhoi, u Vivekanand Singh Rathore ha ka jingdon ryngkat u Additional Superintendent of Police ka Ri Bhoi, u Bah Orville Massar nalor kiwei-kiwei ki heh pulit.
Wat lada ki bor pulit na ka por sha ka por ki ju pynlong ïa kum kine ki jingtalasi kali kaba long ruh shi bynta jong ka jingai jinghikai paidbah, hynrei la sakhi ba ki dang don bun kiba dang pynkheiñ aiñ, kata kiba ñiah haka jingshoh khawiang, kiba pyndait ïa ki light LED kiba thaba palat liam bad kiwei-kiwei ki jingpynkheiñ aiñ. Nalor kiba bun ki jingpynkheiñ aiñ, kawei kaba la kham paw bha kadei hadien ba ki bor pulit ki la ïoh ban bat ïa kawei ka bos night super kaba don ïa u registration number WB29-C-3048 kaba kit ïa kumba 65 ngut ki nongleit nongwan katba u nongñiah pat udei uba la shoh khawiang bad haba khmih bniah ne thew lyngba ka alcometer, ka poi haduh 268 mg ha ka 100 ml kaba la tam bun shah na kaba shah ka aiñ, kata ka 30 mg ha ka 100 ml.
Naka liang u SSP ka Ri Bhoi ula batai ïa ki nongleit nongwan kiba shong hapoh katei ka bos night super halor ka jingma jingmynsaw kaba ap ïa ki naba u nongñiah udei uba la shoh khawiang bad la bthah ba u nongñiah u hap ban shong shwa tad haduh ba u la kham duna ka jingbuaid katba ïa ki nongleit nongwan, la ailad ba kin ïabam shwa katba utei u nongñiah u dang shong ban jah ka jingbuaid.
U SSP lem bad ka kynhun pulit khlem jingmap ki la daiñ kuna lut ïa baroh kiba la pynkheiñ aiñ bad buh ruh ïaka jingmaham kaba jur ba ki nongñiah kali, kidei ban bud ryntih ïa ki kyndon aiñ ñiah kali na ka bynta ban wanrah ïa ka jingshngaiñ na ka bynta ki paidbah nongleit nongwan bad ba lada lap ïa kiba pynkheiñ, ka aiñ kan nym map satia ïa ki khlem jingleh shilliang khmat, hynrei kan treikam kumjuh la kidei ki heh ki haiñ ne kiba duk ba riewspah.
