Jerusalem, Risaw:
Ka tnat shipai Israel, ha ka Sngi Ba-ar, ka la pyntip ba ka Hamas ka la pynphai biang noh sa 4 tylli ki metiap jong ki nong Israel kiba la sahkut sha Gaza naduh ba la ïaid ka thma hapdeng kitei ki arliang mamla bad kane ka long hadien ba ka Israel ka la dep pynithuh ia kito kiba la dep pynphai da ka Hamas ha ka sngi ba la dep.
Ia kitei ki metiap la aiti noh sha ka Red Cross bad hadien kata pat la pynpoi sha Israel, kaba long ruh ka sien ba hadien duh jong ka jingiakylliang briew lane ka jingpyllait briew markylliang ban wanrah noh ia ka jingiasuk hapdeng katei ka kynhun lehnoh jong ka Palestine bad ka Israel, hadien 2 snem jong ka thma hapoh ka nongbah Gaza.
Ha ka Sngi Nyngkong, la ong ba ka Hamas ka la dep pynpoi teng ia 4 tylli ki metiap jong ki nong Israel hadien ki katto- katne kynta ba ka la pyllait noh ia ki briew jong ka Israel kiba dang im bad kiba dang don ha ka kti jongka baroh, hapdeng ka jingialam lynti jong u President ka US- u Donald Trump, ban wanrah noh ia ka jingiasuk bad ban pynsangeh noh ia katei ka thma kaba la neh la 2 snem kynthih mynta.
Ha kawei pat ka liang, la ong ba ka hospital jong ka Gaza pat, ka la ioh pdiang ia ki 45 tylli ki metiap jong ki nong Palestine kiba la aiti bad pynphai noh da ka Israel, ha kaba, kane ruh ka long kawei na ki jingpynbeit jong u Trump hi ban pynkut noh ia ka jingiakynad kaba la neh slem bha.
Katba la ong ba ia kito ki metiap ba la aiti da ka Hamas ha ka Israel, ki dei hi ki nongshong shnong jong ka Israel kiba kynthup ia u Guy Iluz, Yossi Sharabi bad u Daniel Peretz bad kumjuh ruh uwei u khynnah pule jong ka Nepal, u Bipin Joshi.
U Sharabi, uba la don 53 snem ka rta ha ka por ba ka Hamas ka leit hiar thma ia ka Israel ha ka 7 tarik u Risaw jong u snem 2023, ha kaba ki lehnoh Hamas ki la kit lang noh syndon ia ka met jong u na Kibbutz Beeri, katba, u Peretz pat u dang tang 22 snem ha katei ka por bad u la shah khlad ha katei hi ka sngi ka jingleit hiar thma ka Hamas ia ka Israel bad ki la rah lang noh ia ka met jong u ruh sha Gaza.
Katba, ia u Iluz pat, la ong ba ha katei ka por ba ka Hamas ka leit thombor ia ka Israel, u don 26 snem ka rta bad ka leit jia ruh ha katei ka sngi kaba u dang leit ban iadon bynta ha ka tamasa ‘Nova Music’ ba la pynlong da katei ka nongbah jong ka Israel, kaba don ha markhap bad ka nongbah Gaza jong ka Palestine.
Ki shipai Israel ki iathuh ba u Iluz u dang im ha katei ka por ba jia katei ka jingleit thombor ka Hamas, hynrei u khlad ha ka kti ki lehnoh Hamas namar ka jingbym ioh ia k jingsumar kiba ka met jong u ka dei ban ioh ha ka por kaba biang.
Katba, ia ka jingiap jong u pat la pynbna noh da ka Hamas hadien 2 bnai, kata ha u Nohprah jong utei u snem 2023.
