Jowai, Risaw 15
Ka Maïa Club Umjalasiaw ka la rah ïa ka nam lahduh ha ka 2nd Division Football Tournament na ka bynta ka Joybell Suïam Memorial Trophy ba la pynïaid da ka Thadlaskeiñ Sports Association (TSA).
Kane ka jinglah ban pynthikna ka la wan hadien ba ka la pynliem noh ïa ka Bamkamar SC da 3-1 kol ha ka jingïalehkai final kaba la long ha ka sngi Balang ha Multi Sports Complex Wahïajer.
Ha kane ka jingïakhun ka la long kaba ïakhaid bha lyngba ka jinglah ban ïalehkai bha na baroh ar liang mamla. Ka Maïa ka la pynkhih jar nyngkong eh ka minit kaba 10 lyngba u Gabriel Siangshai. Hadien shiteng kynta ka Bamkamar ka la pynphai kylla lyngba u Dlansing Mylliem (36) na ka bynta ban ïakhaid mar shi kol ha kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet, ka Maïa ka la thep biang sa ar kol lyngba u Leimiki Dkhar ha ka minit 61 & 70 na ka bynta ban khur syndon ïa ka jingjop.
Lyngba ka nam jop, ka Maïa ka la ïohpdiang ïa ka song pisa kaba T.40 hajar, katba ka Bamkamar ka la ïoh T.20 hajar. La sam ruh ïa ki khusnam shimet ba kynthup ïa ka Best Player bad Top Scorer ba la ïoh da u Leimiki Dkhar bad Best Goalkeeper ka leit sha u Dame Dkhar. Kine baroh ar ngut ki dei na Maïa Club Umjalasiaw.
U kongsan ba la wan sakhi ïa kane ka jingïakhun final u dei u Executive Member ka JHADC u Bah Jesse Suïam ha ka jingdonlang ki nongïalam bad dkhot nongkitkam ka TSA ba kynthup naduh u President Bah Kmenlang Shylla, Vice President Bah Mutshwa Thabah nalor u Secretary shnong Wahïajer Andrew Sari bad kiwei.
