Shillong, Risaw 15
Haduh 16 ngut ki nongtrei jong kawei ka Call Centre thok kaba don ha HSR Layout Bangalore ba kynthup ïa ki saw ngut kiba dei na ka Jylla Meghalaya, ki la shah kem noh ha ki pulit halor ki kam thok pisa ne ka jingpynïaid ïa ka Business Process Outsourcing (BPO) thok.
Katkum ki khubor la ong ba ka jingshah kem jong kine ki briew ka dei kaba shukor pisa ïa ki nongshongshnong ka United States of America bad ka Canada lyngba ki kor Online.
Nalor ki 4 ngut kiba la shah kem kiba dei na Meghalaya, 8 ngut ki dei na Maharashtra, bad mar uwei na Odisha, Madhya Pradesh, West Bengal bad Gujarat. Halor kane na ka liang ki pulit ki la pynrung da ka Suo Moto case halor kane ka jingjia bad ka jingtohkit ka dang ïaid shakhmat.
Katkum ka jingïathuh ki pulit, kine ki briew ki dei shibynta jong ka kompani thok ba kyrteng ka Cybits Solution Pvt Ltd, kaba don ïa ka ophis treikam ha HSR Layout, Bengaluru, kaba kam thok ïalade ba ka ai jingshakri BPO.
La kynnoh ba kane ka kompani kala thung haduh 20-25 ngut ki nongtrei lyngba ka rynsan online bad hadien ka jingai jinghikai pyntbit, kala bthah ïa ki, ba kin phone bad thok ïa ki briew kiba dei na kiwei pat ki Ri.U Police Commissioner ka Bengaluru u Seemant Kumar Singh ula ong ba kine ki briew kila kam ïalade kum ki heh ka tnat aiñ ka United States bad byrngem ïa ki lanot da ki jingkynnoh ba khaïi droks bad ka jingkamai pisa beaiñ. Hadien, ki sa dawa pisa ha ka nam ban pynkut noh ïa ka case.
“Kine kiba shah kynnoh kila shukor ïa ki briew lyngba ka internet call. Ngi la ïoh kurup haduh 41 tylli ki Computer, 25 tylli ki mobile phone, ID card, router, modems, bad kiwei ki mar na ka ophis kane ka kompani,” ong u Commissioner.
Ki pulit ki ïathuh ba kane ka kompani kala thungkam ïa ki briew da kaba shu leh online bad pynbiej ïa ki da ki jingkular ban pynbiang jaka sah, pynbiang ïa ki kali ban leit ban wan bad ka bam ba ïoh ei. Kiba bun ki ngeit bad kila wan ban trei bad kane ka kompani thok.
Ki pulit kila register da ka suo moto case ha HSR Layout Police Station bad ka jingtohkit mynta ka dang ïaid shaid-shaid ban lap ïa ki briew ba donkti ha lyndet kane ka kompani bad ban ïoh jingkheiñ ruh ïa ka pisa ba kila thok na ki briew ba shabar ka Ri.
