Shillong, Risaw 15
Ka Laitkor SC ka la lah ban pynskhem syndon ïalade ha ka Shillong Premier League 2025, hadien ba ka la pynliem noh ïa ka Sawmer SC da 2-0 kol ha ka jingïalehkai ba khatduh jong ka ha ka sngi Balang ha SSA Stadium kaba ha First Ground, Polo.
Kane ka la wan urlong lyngba u Giovanni Syiemïong (30) bad u Rikmenlang Nongrum (64) na ka bynta ban pynlong ïa ka Laitkor ban pyllait ïalade na u lain jong ka jingma (relegation zone) bad ban ïoh rung sha ka kyrdan ba san ha ka SPL bad kamai 11 point, katba ka Sawmer ka la hiar sha ka kyrdan ba hynñiew bad 9 point.
Haba phai sha ka jingthep ïa kine ki kol, ka kol ba nyngkong ka la wan hadien ba u Giovanni, u la don ha ka khep kaba u kylluid bha bad wut u la ïoh rah shakhmat ïa ka bol bad ban sah satang para marwei bad u Jeffrey Jyrwa rangapkol ka Sawmer, uba la tur shakhmat ban khanglad ïa u, pynban katba un da lah ban pynurlong ïa kane ka jingthmu, u Giovanni, u la ïoh pynpar lyngba ïa ka bol bad ka la rung sha kol.
Haba wan ban bteng ïa ka kylla miet, ka Laitkor ka la ïoh biang ïa ki kato katne ki kabu ksiar ban pynkhih ïa ka jar, pynban dei tad haduh ka khep jong u Rikmenlang ba u la ïoh ba un pyndei da ka khlieh ïa ka bol ban pynkhih biang sa shisien pat bad ban khur syndon ïa ka jingjop.
Ha ka sngi Palei ka Mylliem SC kan ïakhun khatduh ha kane ka lympung pyrshah ïa ka Rang-dajied United FC ha ka por 4:30 nohphai sngi.
