Shillong, Risaw 15
Ka Sorkar Jylla ka la pyllait T.79.5 klur sha ka Garo Hills Autonomous District Council (GHA DC) na ka bynta ban pynkhuid ïa ki tulop ba dang sahteng jong ki nongtrei jong ka.
Na ka pisa baroh, T.11 klur ka dei na ka bynta ki jingsiew ba hap ban siew sha ka GHA DC, katba T.68.5 klur ka dei ka jingsiew lypa na bynta ki khajna ne ‘Royalty’ kiba hadien.
Haba pynbna ïa kane ha ka Sngi Balang, u Myntri Rangbah ka Jylla, u Conrad K. Sangma u la ong, “Ngi la pyllait ïa ka pisa kaba T.79.5 klur sha ka GHADC, na kane kumba T.11 klur ka dei ka jingsiew ba hap siew sha ki, kaba don mynta bad ngi bad kaba sah – T.68.5 klur ka dei ka jingai lypa kaba ngi ai sha ka bhah haba ïadei bad ka khajna hadien-habud.”
Katkum ka jingong jong u, ïa katei ka pisa la mang bad pyllait sha ka ‘Escrow Account’, kaba la thmu kyrpang na ka bynta ban siew tulop.
“Da kane ka pisa, ka GHADC mynta kan don ha ka kyrdan ban pyllait ïa ka jingsahkut pisa kaba 12 bnai sha ki nongtrei jong ka,” la bynrap biang u Conrad.
U Myntri Rangbah u la pynpaw ba tang kawei ka kyndon kaba la buh da ka Sorkar Jylla ka long ba u Principal Secretary un buddien ïa ka kam pisa-tyngka ban pyntikna ba ïa ka pisa la pyndonkam tang na ka bynta ka jingsiew tulop.
“Ngi la ban jur ba ki jingpynkylla ki dei ban don, ki kyndon jingshakri ki dei ban wan ha ka rukom ba ryntih bad ka jinglum khajna ka dei ban kiew. Ngi kyrmen ba ynda kine kiei-kiei baroh ki la biang lut nadong-shadong, ngin sa ïohi ïa ka jinglong-jingman kaba bit ba biang ha ka liang ka pisa-tyngka (ha GHADC),” u la ong.
U Conrad u la ban jur ba kane kam dei ka pisa ba la ai shuh sha ka GHADC, hynrei ka dei ka jingsiew lypa na ka bhah khajna jong ki hi.
Na ka liang ka Sorkar Jylla ka dang kner ïa kane ka jingtyrwa sha 2 tylli kiwei pat ki ADC – ka Jaiñtia Hills Autonomous District Council (JHADC) bad ka Khasi Hills Autonomous District Council (KHADC), ban ai jingïarap kaba kum kane. Hynrei ïa ka rai ban ïashim bynta yn ieh ha la ki jong ki jong ki Council.
“Kiwei pat ki ADC (JHADC & KHADC) kim pat wanrah ïa ka kaiphod jong ki sha ngi haduh mynta bad ngin sa ïatreilang bad ki (ADC)…Kane ka jingtyrwa ka dei ruh ïa ka JHADC bad KHADC. Ngim don hangne ban pynbor ïano-ïano ruh, ngi don hangne ban ïatreilang bad ban kyrshan ha kano-kano ka rukom kaba ngi lah. Lada ki Council ki ïa mynjur, dei tang hangta ngin sa lap ïa ka lynti ban ïatreilang bad ban ïaid shakhmat.” la pynkut u Myntri Rangbah.
