Shillong, Risaw 15
U Cristiano Ronaldo u la thaw biang ïa ka rekod kaba thymmai ban rung sha ka World Cup, hynrei ka Hungary ka la lah ban pynïakhaid da 2-2 kol, kaba la khanglad ïa ka Portugal ha kane ka jingïaknieh ban ïoh rung sha katei ka lympung watla ka dangsah sa ar tylli ki jingïakhun jong kane ka lympung ban ïoh rung sha u snem ban wan.
Hadien ba u Attila Szalai u la pynkhih jar na ka bynta ka Hungary, hynrei u Ronaldo u la lah ban thep ar kol ha ka kylla step na ka bynta ban pynlong ïa ka kynhun jong u Roberto Martinez ban nangjan ban ïoh rung sha ka World Cup 2026.
U Ronaldo uba dang ïai bteng kum u kapten ha ka rta kaba 40 snem, u la lah ban pynïakhaid hadien ka jingïarap pynbuh da u Nelson Semedo bad kaba long ka kol kaba san ha ka kylla step.
Kane ka kol ka la pynlong ïa u ban thep haduh 40 kol ha ka World Cup, kaba la tam ïa ka rekod kaba mynshwa kaba la bat da u Carlos Ruiz (39 kol).
U Ronaldo, uba la pynlehnohei dang shen ïa ka penalty pyrshah ïa ka Ireland, u la bteng ha ka jingthep ha ka jingïalehkai bar ri sha ki 143 kol hashwa ban shongthait, kaba dei kawei pat ka rekod jong ki por baroh.
Une u rangïalehkai shakhmat sa shisien pat u la thep kol biang ha ka por kaba biang, da kaba pynkylla ïa ka kol na u Nuno Mendes ban pynlong ïa ka Portugal ban lamkhmat ha ka kane jingïakhun jong ka Group-F.
Kumba ka long mynta kane ka kynhun jong u Martinez ka la bat ïa ka kyrdan ba hakhlieh ha ka Group-F ha kaba ka la kamai 10 point, da kaba tam da 5 point ïa ka Hungary, kaba la wan ba-ar.
U Dominik Szoboszlai u la lah ban pynïakhaid hashwa ban wan na ka bynta ban pynïoh jingkyrmen ïa ka Hungary ban ïoh rung sha katei ka lympung ka ban long ha United States, Mexico bad Canada.
