Shillong, Risaw 15
Ki kynhun ïalehkai kriket ka Meghalaya ka la lah ban pynliem ïa ka Naga-land da 7 ron ha ka U-19 Men’s Vinoo Mankad Trophy ha ka sngi Balang ha Chandigarh.
Ha kane ka jingïakhun ka Meghalaya ka la shimti ban tied nyngkong ha kaba ka la kamai 155 ron hadien ba ka la shah pynhap wiket baroh ki nongtied ha ka 48.3 over.
Hadien kane, haba la dei ka pali ban kawang bol, ki rangïalehkai ka Meghalaya haduh ka over kaba khatduh ki la lah ban pynhap lut ïa ki wiket ka Nagaland kaba la lah ba kan kamai 148 ha ki 49.1 over.
Ka Nagaland ka la mad ïa ka jingeh ha ka jingwan ban beh jong ka ïa kane ka thong hadien ba ka la lap ba hap haduh 6 wiket hadien ba ka la lah ban kamai tang 38 ron, ha kaba u Apandanka Marak, u la lamkhmat ban khur 4 wiket na ka bynta 18 ron na ki 10 over.
Hadien kane, u kapten ka Nagaland u Aloto Sumi, u la pyrshang ban lamkhmat ïa la ka kynhun hadien ba u la tied 66 ron na ki 139 bol bad ban seng ïa ka nongrim kamai ron paralok kaba 61 ron bad u Anurag Gupta (13 na ki 54).
Ka jingïakhun ka ban wan jong ka Meghalaya kan long pyrshah ïa ka Mizoram ha sngi Thoh-dieng kaba dei artad ka jingïakhun ba khatduh jong ka ’round robin’.
