Shillong, Risaw 15
U Myntri Rangbah ka Jylla, Conrad K Sangma ula kyntait ïa ka jingkynnoh ba ka don ka jingtih uranium ha ri-lum Garo, da kaba pynpaw ba kam don satia kano-kano ka sakhi satar ne ki jingtip ban kyrshan ïa kum kane ka jingkam.
“Kam don satia kano-kano ka kam lane ka sakhi lane ka jingtip kaba pyni ba kum kane ka kam ka la ïaid ha ka thaiñ,” ong u Conrad haba ïakren bad ki lad pathai khubor ha ka sngi Balang haba jubab ïa ka jingkynnoh ba dang shen da u MDC ka BJP na Tura u Bernard N Marak.
U Myntri Rangbah u la kyntu ïa une u nongïalam uba la kynnoh ba un wan shakhmat ryngkat ki jingtip ba bniah lem bad ki sakhi, haba kular ba ka Sorkar kan shimkhia mardor lada lap ïa ki jingshisha.
“Ki nongïalam kiba don ha ka kyrdan ba don jingkitkhlieh, kim dei ban shu kren ïa kum kane ka jingkren tang namar ba ki kwah ban pawkhmat lane tang ban ïoh kren,” ula ong, haba bynrap “Lada dei kaba shisha, kan dei shisha ka kam kaba sngewkhia bad lada ka dei, ai ba kin wan shakhmat ha ryngkat ki jingtip ba bniah bad ki sakhi bad khlem pep, ka Sorkar kan dei kaba nyngkong ban leh eiei”.
Haba ban biang ïa ka nongrim jong ka Sorkar kaba ïeng ban pyrshah ïa ka jingtih uranium, u Conrad ula ong, “Nga la dep ban kren da kaba shai ba ma ngi kum ka Sorkar ngi ïeng skhem ha ka nongrim ba ka jingtih uranium kam dei ban wan jia”.
Hynrei ula ong, “Ki lah ban don kiei-kiei kiba jia ïa kaba ka Sorkar kam tip satia, hynrei lada ka don bad lada ka sakhi ka don ne ka jingtip ba bniah ka don, sngewbha wan sha ngi bad ngin da kmen palat ban leh eiei bad ban shim ïa ki lad ki lynti kaba dei halor kane”.
