Shillong, Risaw 16
Ka ïingbishar Meghalaya High Court ka la ai por saw taïew ïa ka komiti kaba don lai ngut ki dkhot ban aiti ïa ka kaiphod jong ka halor ka jinglong bad jingtreikam mynta jong ki jingkieng thew bad ki jaka thew jingkhia (weighbridge) ha kylleng ka Jylla.
Kane ka komiti ka kynthup ïa u ophisar IAS ba la shongthait u Bah Ethan War Kharmalki, u advocate u Bah Treiborlang Jyrwa bad u ophisar On Special Duty (OSD) jong ka tnat aiñ jong ka Jylla.
Kane ka rai ka wan kum ka jubab halor ka jingmudui PIL da u Tennydard M Marak, da kaba kynnoh ba ka la don ka jingduhnong kaba khraw ha ka khajna namar ka jingbym treikam bha bad ki jingbym biang ki jingdonkam ha ki jaka thew jingkhia.
“Ka komiti kaba lai ngut ki dkhot kaba la thaw kumta kan ai ïa ka kaiphod hapoh saw taïew naduh kane ka tarik,” la ong ka ïingbishar jong ka division bench kaba kynthup ïa u Chief Justice Soumen Sen bad u Justice W Diengdoh ha ka hukum kaba la pynmih ha ka sngi Palei.
Ïa kane ka kam la pynsangeh noh haduh ka 24 tarik u Naiwieng, 2025, ha kaba la khmih lynti ba ïa ka kaiphod jong ka komiti yn bishar bniah da ka Kashari.
Ka bench ka la bthah ruh ïa u Registrar (Administration) ba un pyntip mardor ïa kane ka hukum sha ki dkhot jong ka komiti.
