Shillong, Risaw 16
Ban wanrah ïa ka jingkhuid jingsuba hapoh ka Shnong Mawlai ka Mihngi Eco-Socio Development Associations ka la pynlong da ka jingpynsngewthuh bad ai jinghikai ïa ki khynnah skul ha ka ban pyndonkam biang (recycle) ïa ki plastic bad ban pynlang ïa ki jaboh ha ka jaka ba dei.
Ïa kane ka jingai jingpynsngewthuh bad ai jinghikai halor ka “Solid and Liquid Waster Management” la pynlong ha Mawlai Nongkwar Community Hall ha kaba u Bah Nicholas Kharnami u la wan ban long kum u nong ai jinghikai ïa ki khynnah skul kiba wan ban ïashimbynta, ki ba kynthup ka Mawlai Nongkwar Secondary School, SKC Secondary School bad ka Mount Carmel Hr. Secondary School.
U Bah Barthol Sohlang President Mihngi Eco-Socio Development Associations haba ïoh ban ïakren u la ïathuh ba ka thong hi, ka long ban pynlong ïa ka shnong Mawlai kaba khuid bad ba kane ka jingleit ban ai jingpynshai ha ki skul bad ki shnong haba ïadei bad ka khuid ka suba kan dang ïai-bteng nangne shakhmat.
U Bah Nicholas Kharnami haba ïoh ban ïakren u la pynpaw ka jingsngewkmen ba u ïoh lad ban ai jinghikai bad ban ïa ai jingmut ïa ki khynnah skul kiba long ki samla ka shnong Mawlai. U la ong ba ka “Solid and Liquid Waster Management” ka long kaba kongsan ban shimkhia, khamtam ki shnong ki bym hap shuh hapoh ka municipal namar kham bun ki jingkynduh jingeh.
“Namar kata ka long kaba donkam eh ba ngin ïoh ïa ka jingïasnohktilang jong baroh ki nongshong shnong bad khamtam eh ka jingshimkhia ban pynsngewthuh ïa ki khynnah naduh ki rympei ïing bad ki skul, ynda ki khynnah ki la sngewthuh bha, ym don jingeh shuh ban ïakhun ïa ki ñuit” u la ong.
